Qishloq joylarda agroturizm rivojlantiriladi. Hukumat qarori loyihasi e'lon qilindi

Normativ-huquqiy hujjatlar loyihalari muhokamasi portalida Vazirlar Mahkamasining “Qishloq joylarda agroturizm sohasini jadal rivojlantirish yuzasidan qo‘shimcha chora-tadbirlar to‘g‘risida”gi qarori loyihasi joylashtirildi.

Hujjat bilan Qoraqalpog‘iston Respublikasi va viloyatlarda agroturizmni tashkil etish va rivojlantirish bo‘yicha hududiy muvofiqlashtiruvchi Kengashlarning namunaviy tarkibi tasdiqlanishi mumkin.

Hududiy muvofiqlashtiruvchi Kengashlarga:

agroturizmni tashkil etish imkoniyatiga ega bo‘lgan fermer xo‘jaliklari va boshqa qishloq xo‘jaligi korxonalari imkoniyatlarini chuqur tahlil qilish;

tahlil natijalari asosida agroturizmni tashkil etish va rivojlantirish bo‘yicha hududiy dasturlarni shakllantirish va tasdiqlash uchun Qoraqalpog‘iston Respublikasi Vazirlar Kengashi va viloyatlar hokimliklariga kiritish;

hududiy dasturlarni amalga oshirish bilan bog‘liq tashkiliy masalalarni hal qilish;

hududiy dasturlarga kiritilgan loyihalarni belgilangan muddatlarda amalga oshirilishini ta'minlash;

loyihalarni amalga oshirish jarayonida yuzaga kelgan muammolarni tezkorlik bilan hal qilish choralarini ko‘rib borish;

agroturizm tashkil qilingan fermer xo‘jaliklari va boshqa qishloq xo‘jaligi korxonalarini sayyohlarni jalb qilishdan oldingi ko‘rikdan o‘tkazish va aniqlangan kamchiliklarni bartaraf etish choralarini ko‘rish;

fermer xo‘jaliklari va boshqa qishloq xo‘jaligi korxonalari tomonidan ishlab chiqarilgan mahsulotlarni sayyohlar tomonidan tatib ko‘rish, xarid qilish hamda ishlab chiqarish va yetishtirish jarayonlarida ishtirok etish sharoitlarini yaratish;

agroturizmni rivojlantirish va hududiy dasturlarni amalga oshirishga to‘sqinlik qilayotgan, respublika darajasida hal bo‘ladigan masalalar yuzasidan Turizmni rivojlantirish bo‘yicha muvofiqlashtiruvchi kengashga takliflar kiritib borish;

agroturizm tashkil etgan fermer xo‘jaliklari va boshqa qishloq xo‘jaligi korxonalarida innovatsion g‘oyalar, ishlanmalar
va texnologiyalarini keng joriy etishni qo‘llab-quvvatlash hamda keng targ‘ib etishga ko‘maklashish;

hududning geografik, ekologik salohiyatidan kelib chiqib, agroturizm yo‘nalishini rivojlantirishda xorijiy mamlakatlarning tajribasini chuqur o‘rganish va joriy etish bo‘yicha takliflar kiritish;

agroturizm obektlarining to‘liq geografik joylashuvi to‘g‘risidagi batafsil ma'lumotlarni elektron xaritalarga (google maps va boshqalar) joylashtirish vazifalari yuklatiladi.