Toshkentda yagona billing tizimi joriy etiladi

Toshkent shahar hokimligida Belarusning SoftClub kompaniyasi vakillari bilan uchrashuv bo‘lib o‘tdi, deb xabar qilmoqda Toshkent shahar hokimligi matbuot xizmati.

Unda Belarusning SoftClub kompaniyasi xalqaro rivojlantirish bo‘yicha direktori Vladimir Torchik, SoftClub kompaniyasining O‘zbekistondagi vakili Sergey Suprun va Toshkent shahar hokimligining mutasaddilari ishtirok etdi.

Yig‘ilishda kompaniya vakillari kompaniyaning mamlakatda va boshqa respublikalarda olib borayotgan hamkorlikdagi tajribalari hamda Minsk shahrida mavjud billing tizimining imkoniyatlari va afzalliklari haqida ma'lumot berdi.

Kelajakda Toshkent shahrida Uy-joy kommunal xizmat ko‘rsatish tizimida Yagona billing (yagona hisoblash) tizimini joriy qilishni SoftClub kompaniyasi o‘z zimmasiga olishga tayyor ekanligi ta'kidlab o‘tildi va bu borada tomonlar kelgusidagi faoliyat borasida kelishib oldilar.

Belarusning SoftClub kompaniyasi 25 yil davomida faoliyat ko‘rsatib rivojlanib kelayotgan va MDH mamlakatlari ichida davlat sektori va moliya sohasida dasturiy ta'minotlar ishlab chiqish bo‘yicha ixtisoslashgan kompaniyalardan biridir.