Oʻzbekistonlik shifokor Toshkentdan Seulga uchayotgan samolyotda ahvoli keskin yomonlashgan ayolning hayotini saqlab qoldi.

Hodisa 11-oktabr kuni Toshkent – Seul yoʻnalishidagi HY511 reysida roʻy bergan. Samolyotda boʻlgan shifokor Hasan Komilov ekipaj aʼzolari bilan birgalikda ayolga shoshilinch tibbiy yordam koʻrsatgan.

Voqeaga guvoh boʻlgan yoʻlovchi Threads ijtimoiy tarmogʻida yozishicha, samolyotdagi boshqa oʻzbekistonliklar ham ushbu koreys ayolga yordamga shoshilgan. Ular ayolga suv, konfet, shokolad, yostiq va koʻrpalarini bergan. Bortkuzatuvchilar ham yordam koʻrsatishda faol qatnashgan.

«Rostini aytsam, ularning barchasiga qoyil qoldim. Oʻzbekistonga birinchi marta keldim va oʻzbekistonliklarning mehr-oqibatidan juda taʼsirlandim. Inson hayotini saqlab qolishdan ham sharafli kasb boʻlmasa kerak», – deb yozgan yoʻlovchi.

SSV maʼlumotiga koʻra, Hasan Komilov Samarqand shahridagi xususiy klinika rahbari, otorinolaringolog, Toshkent davlat tibbiyot universiteti tadqiqotchisi hisoblanadi. U ayni paytda Janubiy Koreyaning Chungbuk universitetida malaka oshirmoqda.

Shifokorning soʻzlariga koʻra, parvoz vaqtida ekipaj aʼzolari yoʻlovchilar orasidan tibbiy yordam koʻrsata oladigan mutaxassis bor-yoʻqligini soʻragan. Komilov hushsiz yotgan ayolni koʻrib, darhol uning yoniga borgan.

Tekshiruvda ushbu ayolning qon bosimi va pulsi aniqlanmagan. U shok holatida boʻlgan, tanasi koʻkarib, sovib ketgan. Shifokor oʻzi bilan olib yuradigan dori-darmonlardan, shuningdek, ekipaj taqdim etgan kislorod niqobi va tibbiy vositalardan foydalanib, ayolga shoshilinch yordam koʻrsatgan.

«Birgalashib bemorga tez yordam muolajalarini oʻtkazdik. 10 ming metr balandlikda 10−15 daqiqada bemor oʻziga kela boshladi», – degan Hasan Komilov SSVga bergan intervyusida.

Tez yordam koʻrsatilganidan keyin u ekipajga samolyotni qoʻndirmasdan, parvozni davom ettirish mumkinligini bildirgan. U keyingi bir soat davomida ayolga yordam koʻrsatishda davom etgan.

«Bu holat shifokor uchun qahramonlik emas, bu bizning har kuni qilayotgan mashaqqatli mehnatimiz», – deydi Komilov.