Ukraina prezidenti Volodimir Zelenskiy AQSH haqida gapirganida ehtiyotkorroq boʻlishi lozim, dedi Amerika moliya vaziri Skott Bessent.
U Ukraina rahbarining Amerika razvedka maʼlumotlari berishni toʻxtatib qoʻygani hamda Starlink va Starshield tezligi Oq uy buyrugʻi bilan cheklangani toʻgʻrisidagi soʻzlariga ana shunday izoh berdi.
«Zelenskiy haqiqatga toʻgʻri kelmaydigan bunday bayonotlar berishda juda ehtiyotkor boʻlishi lozim», - dedi Bessent NBC News efirida.
U shuningdek, AQSH Ukrainani oʻz ittifoqchisi deb hisoblashi toʻgʻrisidagi savolga javob berishdan oʻzini olib qochdi.
Bessent oʻzining AQSH prezidenti yoki davlat kotibi emasligini aytarkan, AQSH Moskvani emas, Kiyevni taʼminlayotganini taʼkidladi.
«Aynan mana shu narsa ittifoqchilik munosabati boʻladi», - deya qoʻshimcha qildi u.
Avvalroq Volodimir Zelenskiy Space X kompaniyasi Oq uy buyrugʻi bilan sunʼiy yoʻldosh interneti tezligini cheklaganini hamda AQSH Ukrainaga Rossiya zarbalari haqida razvedka maʼlumotlarini bermaganini aytgandi.
Oʻz navbatida, AQSH davlat kotibi Marko Rubio Oq uy Space X kompaniyasining sunʼiy yoʻldosh internetini Ukraina harbiylari uchun cheklash toʻgʻrisida farmoyish bermaganini maʼlum qildi.
Ilon Mask esa Ukraina foydalanayotgan Starshield tizimida tezlik va foydalanish cheklovlarini SpaceX emas, AQSH harbiylari belgilashini aytdi.
