OKMK Afg‘onistonga mahsulot eksport qila boshladi

Olmaliq kon-metallurgiya kombinati Afg‘oniston Islom Respublikasiga mahsulot eksport qilishni boshladi. «Olmaliq KMK» matbuot xizmati xabariga ko‘ra mart oyida Sheroboddagi sement zavodi mahsulotlari qo‘shni mamlakatga eksport uchun yuborilgan.

«2018 yil ishga tushirilgan va Olmaliq kon-metallurgiya kombinati tarkibida o‘z faoliyatini boshlagan Sherobod sement zavodida ishlab chiqarilgan PS 400 D20 markali kulrang sement qo‘shni Afg‘oniston Islom Respublikasiga eksport qilindi.

Afg‘onistonning «Hamid Company LTD» kompaniyasi qurilishda muhim sanalgan kombinatning xaridorgir sement mahsulotidan jami 960 tonna sement sotib oldi va bu kabi hamkorlik yana davom etadi», deyiladi xabarda.

15ta vagonga ortilgan sement mahsulotlari «Mozari-Sharif» stansiyasiga yetkazilgan. 

Qayd etilishicha, «Olmaliq KMK» kelishuv doirasida yil davomida 900 ming tonna kulrang sementni Afg‘onistonga yetkazib beradi.