IShID safiga o‘tib ketgan rossiyalik ofitser 19 yilga qamaldi

Shimoliy Kavkaz okrug harbiy sudi Rossiya mudofaa vazirligi sobiq xodimi Denis Xisamovni 19 yilga ozodlikdan mahrum qildi, deb xabar berdi TASS. Xabarda aytilishicha, u Suriyada bir yil davomida IShID terrorchilik tashkiloti jangarilari safida jang qilgan.

U jazoni qat'iy tartibdagi koloniyada o‘taydigan bo‘ldi. U shuningdek, soxta pul chiqarganlikda ayblanib bir yilga ozodlikdan cheklash jazosi ham berildi va zaxiradagi kapitan unvonidan mahrum qilindi.

Agentlikning bildirishicha, ofitser 2009 yilda xizmatdan bo‘shagan va o‘z biznesini boshlagan. U masjidda tojikistonlik shaxs bilan tanishib qolgan va birgalikda soxta pul chiqarish bilan shug‘ullanishgan. Ular 2015 yilda qo‘lga olingan, ammo Xisamov Suriyaga qochib ketishga muvaffaq bo‘lgan. U Raqqa shahrida IShID jangarilar lagerida harbiy tayyorgarlikdan o‘tgan va Suriyada IShID tarafida turib janglarda qatnashgan.

U 2016 yilda Turkiyaga kelib, valuta almashtirish punktini talagan va olingan pullarni Suriyaga jo‘natish uchun bergan.

Xisamov 2017 yil aprelda Turkiyada qo‘lga olingan va Tojikistonga deportatsiya qilingan. U yerda uning pasporti qalbaki ekanligi aniqlangan va Moskvaga deportatsiya qilingan.