Tojikiston va Afg‘onistonni bog‘lovchi 8-ko‘prik quriladi

Og‘o Xon jamg‘armasi Panj daryosi ustidan Tojikiston va Afg‘onistonni bog‘lovchi 8-ko‘prikni quradi. Tegishli kelishuv Tojikiston hukumati tomonidan ma'qullangan. Respublikaning transport vazirligiga jamg‘arma bilan kelishuvni imzolash vazifasi topshirilgan. 

Loyihaga ko‘ra, Xatlon viloyati Farxor tumanining Kokul hududida 180 metrlik ko‘prik qurish rejalashtirilgan. Qurilajak ko‘prik Farxor tumanini Afg‘onistonning Taxor viloyatidagi Oyxonum hududi bilan bog‘laydi. Shuningdek, loyiha doirasida Vose' tumanidan Farxorgacha 50 kmlik avtomobil yo‘li quriladi.  

Tojikiston va Afg‘onistonni hozirda 7 ta ko‘prik bog‘laydi. Avvalroq Og‘o Xon jamg‘armasi Tog‘li Badahshon hududida 5 ta hamda Xatlon viloyatidagi Shamsiddin Shoxin tumanini Afg‘onistonning Xoxon uyezdi bilan bog‘lagan yana bir ko‘prik barpo etgan. 

Tojikistonda 1992 yildan beri Og‘o Xon tashkiloti faoliyat yuritadi. Tashkilotning bo‘linmalari respublikaning barcha viloyatlarida mavjud bo‘lib, ular infratuzilma, energetika, sog‘liqni saqlash, ta'lim va madaniyatni rivojlantirish dasturlarini amalga oshirib keladi. Tashkilotning yirik loyihalari orasida shuningdek “Pamirenergo” energetik kompaniyasini tiklash hamda Xitoy va Pokistonga chiquvchi Murg‘ob-Kulma avtomobil yo‘lini qurish bor.