Sudgacha soliq nizolari qanday ko‘rib chiqiladi?

Moliya vazirligi va DSQning qo‘shma qarori bilan O‘zbekiston Respublikasi Moliya vazirligi huzuridagi Soliq to‘lovchilar va davlat soliq xizmati organlari o‘rtasidagi soliq nizolarini sudgacha hal qilish kengashi tomonidan soliq nizolarini ko‘rib chiqish reglamenti tasdiqlandi. Bu haqda Norma xabar bermoqda. 
 
Eslatib o‘tamiz, Kengash soliq to‘lovchilar va soliq organlari o‘rtasida yuzaga keladigan nizolarni ko‘rib chiqish hamda soliq to‘g‘risidagi qonun hujjatlarini qo‘llashda nizoli masalalar yuzasidan xulosalar chiqarish uchun tashkil etilgan. Bunda DSQning Soliq nizolarini sudgacha hal qilish boshqarmasi tomonidan avval ko‘rib chiqilgan, u arizachini qoniqtirmagan yoki qisman qoniqtirgan nizolargina qabul qilinadi.
 
Kengash soliq solish obektlarini aniqlash, soliq solinadigan bazani hisoblash, soliq stavkalari va soliq imtiyozlarini qo‘llash bilan bog‘liq kelishmovchiliklarni ko‘rib chiqishi mumkin. 

QHTBT portalida Soliq nizolarini sudgacha ko‘rib chiqish mexanizmini belgilovchi reglament loyihasi muhokama qilingan edi. 
 
Hujjatning tasdiqlangan tahririda arizaga ilova qilinadigan hujjatlar ro‘yxati sezilarli darajada: 6 tadan 2 tagacha qisqargan. Shu tariqa, tasdiqlangan shakldagi ariza bilan birga Kengashga quyidagi hujjatlarning nusxalarini taqdim etish zarur:

• soliq to‘lovchini qoniqtirmagan yoki qisman qoniqtirgan Soliq nizolarini sudgacha hal qilish boshqarmasi xulosasi;
• ariza soliq agenti yoki vakil tomonidan taqdim etilganda ularning vakolatini tasdiqlovchi hujjat.
 
Arizachi o‘z xohishiga ko‘ra soliq nizosi masalasiga aloqador bo‘lgan boshqa hujjatlarning nusxalarini ham ilova qilishi mumkin.
 
Hujjatlarni o‘rganish, soliq nizosining o‘zini ko‘rib chiqish tartib-taomili, uning muddatlari o‘zgartirishlarsiz tasdiqlangan.
 
Shu bilan birga, qabul qilingan hujjat bilan Kengash majlislarini o‘tkazish davriyligi bir oyda kamida 1 marotaba o‘rniga 2 marotaba etib belgilangan, ko‘rib chiqilgan nizo bo‘yicha Kengashning xulosasini taraflarga yuborish muddati esa tasdiqlangan paytdan boshlab 1 ish kunigacha qisqartirilgan (loyihaga ko‘ra – 2 ish kuni mobaynida).
 
Hujjat 12.04.2019 yildan kuchga kirdi.