Maktabda pullik xizmatlar: u qanday amalga oshiriladi?

O‘zbekiston Respublikasi Xalq ta'limi vazirligi tizimidagi umumiy o‘rta ta'lim muassasalarida pullik ta'lim xizmatlari ko‘rsatish tartibi to‘g‘risida nizom tasdiqlandi.
 
Norma’ning yozishicha, qo‘shimcha ta'lim berishga qaratilgan pullik ta'lim xizmatlari maktablarning o‘quv dasturlarida nazarda tutilmagan (davlat ta'lim standartlaridan tashqari) mashg‘ulotlar bo‘yicha maktab direktori va o‘quvchining ota-onasi (ularning o‘rnini bosuvchi shaxslar) o‘rtasida tasdiqlangan shaklda tuziladigan shartnoma asosida ko‘rsatiladi. Direktor va pedagoglar o‘quvchilarni pullik xizmatlarga majburiy tartibda jalb etishga haqli emas.
 
Har yili maktablarda pullik ta'lim xizmatlari ko‘rsatish yillik rejasi tasdiqlanadi. Unda:

• ta'lim xizmatlar turi (qo‘shimcha ta'lim berish yo‘nalishlari);
• mashg‘ulotlarni o‘tish vaqtlari;
• dars soatlari miqdori;
• har bir soat uchun to‘lanadigan narx miqdori. Bunda kam ta'minlangan oilalarning farzandlariga to‘lovlar umumiy narx miqdorining 50%i miqdorida belgilanadi;
• bitta guruhda mashg‘ulotlarda qatnashuvchilarning soni - 35 nafar o‘quvchidan ko‘p bo‘lmagan miqdorda (individual tarzda mashg‘ulotlar o‘tkazilishi mumkin);
• yo‘nalishlar bo‘yicha o‘qituvchi yoki mutaxassis F.I.O.;
• mashg‘ulot o‘tish joyi (sinflar) ko‘rsatiladi.
 
Yillik reja Xalq ta'limi vazirligining rasmiy veb-sayti yoki maktablarning rasmiy veb-saytlariga joylashtiriladi.
 
Ta'lim xizmatlari narxlari Kuzatuv kengashi bilan kelishilgan holda maktab direktori tomonidan tasdiqlanadi. To‘lov har oyning 5-sanasigacha (100 foiz oldindan to‘lov) amalga oshiriladi. To‘lov bank bo‘linmalari orqali maktabning tegishli G‘aznachilik bo‘limlarida ochilgan shaxsiy g‘aznachilik hisobvaraqlariga naqd pul yoki pul o‘tkazish yo‘li bilan amalga oshirilishi mumkin. Bevosita maktabda to‘lovni amalga oshirish taqiqlanadi.
 
Kuzatuv kengashi bir yilda kamida 2 marta o‘quvchilar va ularning ota-onalari o‘rtasida ko‘rsatilayotgan pullik xizmatlar sifatini aniqlash maqsadida so‘rovnoma o‘tkazib boradi.
 
Hujjat 23.04.2019 yildan kuchga kirdi.