Formula-1: Lyuis Xemilton Kanadadagi bosqichda g‘olib bo‘ldi

Mercedes jamoasining poygachisi, amaldagi chempion Lyuis Xemilton “Formula-1” poygasining 7-bosqichi – Kanada Gran-prisida g‘olib bo‘ldi.

Marra chizig‘ini birinchi bo‘lib Ferrari a'zosi Sebastyan Fettel kesib o‘tgan, biroq unga 5 jarima soniyasi berilgan. Bunga esa uning 48-aylanada trassaga xavfli qaytishi sabab bo‘lgan, buning oqibatida Xemilton devorga urilishiga bir baxya qolgan.

Fettel garchi birinchi kelgan bo‘lsa-da, jarima soniyalari sababli 2-o‘ringa tushib ketgan. 3-o‘rinni Ferrari’ning yana bir a'zosi Sharl Lekler egallagan. 

Fettel jarima va poyga natijalaridan norozilik bildirgan. Buning ishorasi sifatida u matbuot bilan suhbatlashishdan bosh tortgan. Shuningdek, poygachi bolidlar oldidan o‘tayotganda poygachilar qaysi o‘rinlarni egallaganlarini ko‘rsatuvchi tablichkalarni o‘zgartirib qo‘ygan. U Xemilton mashinasi oldiga 2 raqami, o‘zining bolidi oldiga esa 1 raqami yozilgan tablichkani qo‘ygan. 

Umumiy hisobda 162 ochko bilan Xemilton yetkachilik qilmoqda. 2-o‘rinni Valtteri Bottas (132 ochko), 3-o‘rinni Fettel (100 ochko) egallamoqda.

Poyganing navbatdagi bosqichi 21-23 iyun kunlari Fransiyada bo‘lib o‘tadi.