Yaponiyaning Osaka shahrida 28-29 iyun kunlari o‘tkazilishi rejalashtirilgan “Katta yigirmatalik” sammitiga 30 minggacha kishi, jumladan bir qator davlatlar yetakchilari, delegatsiyalari va jurnalistlari tashrif buyuradi. Ularning xavfsizligini 25 mingdan ko‘proq politsiyachi ta'minlaydi.
Bu haqda Osaka prefekturasi bosh politsiya boshqarmasi rahbari Takaxisa Isida ma'lum qildi.
E'tiborlisi, shuncha sondagi politsiyachi birgina davlat yetakchisi – AQSh prezidenti Donald Trampning may oyida Yaponiyaga tashrifi vaqtida xavfsizlikni ta'minlashga jalb qilingandi.
Shaharda sammit o‘tkazilishi munosabati bilan transport uchun jiddiy cheklovlar kiritiladi, yirik temir yo‘l stansiyalarida saqlash kameralaridan foydalanish taqiqlanadi. Osaka markaziy vokzali va sammit o‘tkaziladigan hududdagi ko‘chalardan barcha chiqindi baklari olib tashlanadi.
May oxiridan Osakadagi do‘konlar, maktab va bolalar bog‘chalari darvozalarida sammit munosabati bilan cheklovlar kiritilishi haqidagi e'lonlar joylashtirilgan. Ko‘plab do‘konlar esa “Katta yigirmatalik” yetakchilari uchrashuvi vaqtida umuman ishlamaslikka qaror qilgan.
