Yong‘in chiqishi natijasida rossiyalik 14 dengizchi halok bo‘lgan suvosti apparati aslida «Losharik» nomi bilan ma'lum bo‘lgan AS-12 o‘ta maxfiy suvosti kemasidir. Bu haqda RBK xabar bermoqda.
Avvalroq, Rossiya Harbiy Dengiz Flotining (HDF) 14 nafar dengizchisi suvosti ilmiy-tadqiqot apparatida yuz bergan yong‘in natijasida halok bo‘lgani haqida xabarlar tarqalgan edi.
RBK ma'lumotiga ko‘ra, bu kema suvosti ilmiy-tadqiqot apparati emas, balki o‘ta maxfiy atom suvosti kemasidir. Unda yuz bergan yong‘in natijasida 14 nafar dengizchi tutundan zaharlanib halok bo‘lgan. Yong‘in o‘chirilgan, kema esa ayni paytda Severomorsk harbiy-dengiz bazasida saqlanmoqda.
AS-12 atom suvosti kemasi bir-biri bilan bog‘langan bir qancha titan sferalardan iborat. Kema 6 ming metr chuqurlikkacha tushadi va suv ostida 30 uzel tezlikda harakatlanadi.
AS-12 kemasining texnik ma'lumotlari maxfiylashtirilgan. Taxminlarga ko‘ra, uning uzunligi 70 metrni, eni esa 7 metrni, to‘la suv sig‘imi 2 ming tonnani tashkil qiladi. «Losharik» nomini esa multfilm qahramoni bo‘lmish shishiriladigan sharlardan yasalgan toychoqdan olgan.
