Hukumat matbaa faoliyatiga oid qaror qabul qiladi

Normativ-huquqiy hujjatlar loyihalari muhokamasi portalida Vazirlar Mahkamasining “Matbaa faoliyatini amalga oshirish uchun ruxsat berish tartibi to‘g‘risidagi Nizomni tasdiqlash haqida”gi qarori loyihasi e'lon qilindi.

Nizomga ko‘ra, matbaa faoliyati – bosma mahsulotlarning qoliplarini tayyorlash, shu jumladan muhr va shtamplarni yasash, chop etish, muqovalash va chop etishdan keyingi jarayonlaridir. Mazkur jarayonlarning barchasi yoki alohida jarayoni ham matbaa faoliyati hisoblanadi.

Matbaa faoliyatini amalga oshirish uchun ruxsat O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi Qoraqalpog‘iston Respublikasi, viloyatlar va Toshkent shahar axborot va ommaviy kommunikatsiyalar boshqarmalari tomonidan matbaa faoliyati amalga oshiriladigan hudud bo‘yicha beriladi.

Matbaa faoliyatini amalga oshirish uchun ruxsat etish xususiyatiga ega hujjat sifatida tasdiqlangan shaklga muvofiq guvohnoma beriladi. Guvohnoma uch yil muddatga beriladi.

Matbaa faoliyati yuridik shaxslar tomonidan amalga oshiriladi. Matbaa faoliyatini amalga oshirish uchun yuridik shaxsning balansida matbaa uskunalari bo‘lishi shart. Matbaa uskunalaridan ijara yoki boshqa asoslarda foydalanishga yo‘l qo‘yilmaydi.

Matbaa faoliyatini amalga oshirishga ruxsat olish quyidagi hujjatlar taqdim etiladi:

a) muvofiq shaklda matbaa faoliyatini amalga oshirish uchun ariza;

b) yuridik shaxs davlat ro‘yxatidan o‘tganligi to‘g‘risidagi guvohnomaning nusxasi;

v) muvofiq shaklda matbaa uskunalarining ro‘yxati;

g) matbaa uskunalarining ariza beruvchi balansida ekanligini tasdiqlovchi hujjat nusxasi;

d) matbaa faoliyati amalga oshiriladigan obektining to‘liq pochta manzili va obekt (ko‘chmas mulk)ga egalik huquqi yoki undan foydalanish bo‘yicha ijara shartnomasining nusxasi;

ye) matbaa faoliyatini amalga oshirishga ruxsat berish uchun belgilangan miqdorda davlat boji to‘langani to‘g‘risidagi to‘lov topshiriqnomasi.

Matbaa faoliyatini amalga oshirishga ruxsat berishni rad etishga quyidagilar asos bo‘ladi:

shu nomdagi matbaa faoliyati bilan shug‘ullanadigan yuridik shaxs avval ro‘yxatga olingan bo‘lsa;

ariza beruvchi tomonidan belgilangan hujjatlar to‘liq bo‘lmagan hajmda taqdim etilsa;

matbaa korxonasining balansida tegishli matbaa uskunalari mavjud bo‘lmasa;

ishchi guruhning asoslantirilgan salbiy xulosasi berilgan bo‘lsa;

ariza beruvchi tomonidan taqdim etilgan hujjatlarda noto‘g‘ri yoki buzib ko‘rsatilgan ma'lumotlar mavjudligi aniqlansa.

Matbaa faoliyatini amalga oshirishga ruxsat berish to‘g‘risidagi ariza qayta ko‘rib chiqishda rad etish to‘g‘risidagi xabarnomada ko‘rsatilmagan asoslar bo‘yicha takroran rad etilishiga yo‘l qo‘yilmaydi.

Guvohnoma quyidagi hollarda qayta rasmiylashtiriladi:

Tadbirkorlik sub'yekti guvohnomada ko‘rsatilmagan matbaa faoliyatining boshqa turlarini amalga oshirishni istasa;

matbaa faoliyatini amalga oshiradigan yuridik shaxs nomi, tashkiliy-huquqiy shakli, uning joylashgan joyi o‘zgarsa.

Ariza beruvchilar guvohnomani qayta rasmiylashtirish haqidagi ariza bilan yuqorida ko‘rsatilgan ma'lumotlarni tasdiqlovchi hujjatlarni tegishli hududiy boshqarmaga taqdim etadi.

Ariza hududiy boshqarma tomonidan o‘n ish kuni ichida ko‘rib chiqiladi. Ariza beruvchilarning qayta rasmiylashtirish to‘g‘risidagi murojaatini ko‘rib chiqish ruxsat berish uchun nazarda tutilgan tartibda amalga oshiriladi.

Guvohnoma qayta rasmiylashtirilgandan so‘ng hududiy boshqarma davlat reyestriga tegishli o‘zgartirishlar kiritadi.