Bugundan yirik bozorlar yaqinida to‘xtash qoidalari buzilishini qayd etuvchi kameralar ish boshladi

Bugun, 10 iyul kunidan Toshkentning bir nechta bozorlari yaqinidagi yo‘llar bo‘ylab to‘xtash va to‘xtab turish qoidalari buzilishini qayd etuvchi avtomatlashtirilgan foto- va videokameralar ish boshladi. Bu haqda Toshkent shahri IIBB matbuot xizmati xabar bermoqda.

«Abu-Saxiy», «Bek To‘pi», «Chilonzor buyum bozori» (Ippodrom), «O‘rikzor» bozorlari yo‘llarida 3.27 belgisini mensimaganlarni qayd etishga mo‘ljallangan 4ta statsionar avtomatlashtirilgan kameralar o‘rnatilgan.

Bu kameralar 360 darajaga o‘girila oladi. 

Avtomobil mumkin bo‘lmagan joyda to‘xtagach, videokamera avtomatik tarzda (inson aralashuvisiz) vaqtni va «qoidabuzar» avtomobilning davlat raqamini qayd etadi. Ma'lumotlar onlayn tarzda bazaga yo‘naltiriladi, u yerda esa AutoCon-SC/M dasturiy ta'minot jarima solish bo‘yicha Qarorni shakllantirib uni «O‘zbekiston pochtasi» AJga qoidabuzarga jo‘natish uchun yo‘llaydi. Xatda jarimani 60 kunlik muddat ichida to‘lash zarurligi, ushbu muddat tugagach tizim xatga biriktirilgan kvitansiyani avtomatik tarzda to‘sib qo‘yib, jarima to‘lanmaganligi to‘g‘risidagi ma'lumotni O‘zbekiston Respublikasi Bosh prokuraturasi qoshidagi Majburiy ijro byurosiga (MIB) jo‘natishi ma'lum qilinadi. MIB, o‘z navbatida, transport vositasi egasining nomiga rasmiylashtirilgan mulkka taqiq qo‘yadi. Ushbu sanksiyalar qoidabuzar-avtomobil egasiga oldi-sotdi kelishuvlarini olib borishga yo‘l qo‘ymaydi. YHQni buzganlik uchun jarimani o‘z vaqtida to‘lamaslik ham qo‘shimcha moddiy xarajatlarga olib keladi. 

Bundan tashqari, kamera qoidabuzarlikni qayd etib uni Markazga yo‘llaganidan keyin, to‘lov muddati davomida sizga nisbatan bir qator cheklovlar o‘rnatiladi. Xususan, sizda mashinani IIBB YHXB tumanlararo bo‘linmalarida texnik ko‘rikdan o‘tkazish yoki boshqa fuqaroning nomiga rasmiylashtirish imkoni bo‘lmaydi. Ushbu cheklov bo‘lajak xaridorni «qarzdor» mashina sotib olib qo‘yishda himoya qiladi.

Ma'lumot uchun, 3.27 belgisi ostida avtomobilni to‘xtatish O‘zbekiston Respublikasi Ma'muriy javobgarlik to‘g‘risidagi kodeksning 128-6-moddasiga muvofiq EKIHning 3 baravarigacha (608 190 so‘m) jarima solinishiga sabab bo‘lishi mumkin.