Samarqanddagi sayyohlar nimadan norozi?

«Milliy tiklanish»  nashri Samarqandga sayohat va boshqa maqsadlarda kelgan xorijiy mehmonlar bilan so‘rov o‘tkazdi. Unda sayyohlar Samarqanddagi turistik muhitdagi bir qator kamchiliklarni sanab o‘tishgan.

Portugaliyalik Antonio Gomish:

«Mehmonxonalarda internet tezligi nihoyatda past, xonalarda xizmatchilar bilan bog‘lanish uchun chaqiruv telefoni yo‘q».

Hindistonlik Umesh Haytan:

«Sayyohlarning millati va dinini e'tiborga olgan holda ovqatlanish joylari tashkil etilsa, ayni muddao bo‘lar edi. Shahardagi barcha kafe va restoranlarda mol go‘shtisiz tayyorlanadigan taomlarni topish ilojsiz».

Pokistonlik Rizvon Aziz Muhammad:

«O‘zbekistonga asosan keksa yoshdagi sayyohlar kelishini inobatga olib, ularning salomatligini yaxshilash uchun turistlarga tibbiy xizmat ko‘rsatish faoliyatini yo‘lga qo‘yish maqsadga muvofiq».

Germaniyalik Tomas Myuller:

«Tarixiy obidalarga kirish chiptalari narxlarida tafovut bor. Narxlar bir xil etib belgilansa yaxshi bo‘lardi. Shuningdek, temiryo‘l vokzalidagi yerosti yo‘liga eskalator o‘rnatilsa, yuk bilan kelgan turistlar uchun ham, mahalliy aholi uchun ham qulay bo‘lardi».