Qaysi maishiy texnikada energiya samaradorligi klassi ko‘rsatilishi shart?

O‘zbekistonga olib kiriladigan va sotiladigan, texnik hujjatlarida, markirovkasida va etiketkalarida energiya samaradorligining tegishli klassi to‘g‘risidagi axborotlarning majburiy mavjud bo‘lishi haqidagi talab tatbiq etiladigan maishiy elektr priborlari ro‘yxatiga qo‘shimchalar kiritildi.

 Eslatib o‘tamiz, maishiy elektr priborining klassi lotincha bosh harflar bilan belgilanadi: «A», «V», «S», «D», «E», «F», «G» (kamayib borishiga ko‘ra). Qo‘shimcha ravishda – «A+», «A++» va undan yuqori (ortib borishiga ko‘ra) – ular «A» klassi darajasidan ancha oshadi.

 Ro‘yxatdagi energiya samaradorligi klassi ko‘rsatilmagan priborlarni (ilgari foydalanilganlaridan tashqari) 2016 yil 1 yanvardan import qilish, 1 iyulidan esa –mamlakatda realizatsiya qilish taqiqlandi. Quyi klassdagi tovarlarni import qilish va realizatsiya qilish bosqichma-bosqich: 2017 yildan – «G», 2018 yildan – «F», 2019 yildan – «Ye» klassidagilar taqiqlandi.

 2019 yil mayda «O‘zstandart» agentligiga ro‘yxatni qayta ko‘rib chiqish va Vazirlar Mahkamasiga takliflar kiritish topshirildi. Natijada unga 8 ta yangi pozitsiya kiritildi:

• markaziy isitish qozonlari, 8402-tovar pozitsiyasidagi qozonlardan tashqari, va boshqalar (TIF TN kodi 8403 10 900 0);

• suvi oqib turadigan yoki to‘planadigan noelektr suv isitgichlar (idishli) va boshqalar (8419 19 000 0);

eng katta gorizontal hajmi 120 sm dan oshmaydigan havo tortuvchi qopqoqlar va javonlar (8414 60 000 0);

• changyutgichlar (8508 11 – 8508 60);

elektr dvigatel o‘rnatilgan maishiy elektr mexanik mashinalari (8509 40 – 8509 80);

• yorug‘lik tarqatuvchi diodlar (LED), shu jumladan lazer diodlar (8541 40 100 0);

• lampalar va yorug‘lik priborlari va boshqalar (9405 10 400 9);

• cho‘g‘lanma lampalar bilan foydalanishga mo‘ljallangan priborlar va boshqalar (9405 40 910 9).