Iste'mol qilmaslik kerak bo‘lgan mahsulotlar ma'lum qilindi 

Ispaniyalik parhezshunoslar La Vanguardia nashri bilan suhbatda “barcha mahsulotni yeyish mumkin, biroq me'yorida” degan tasdiqni xato deb, ratsiondan chiqarib tashlash kerak bo‘lgan bir qator mahsulotlarni sanab o‘tishdi.

Xususan, o‘rta va uzoq muddatli istiqbolda rafinadlangan (tozalangan) un iste'mol qilish zarar keltirishi mumkin. Bu mahsulot sababli qonda glyukoza miqdori keskin oshib-pasayishi mumkin. Parhezshunos Pilar Eskerning ta'kidlashicha, bu holat qand kasalligi avj olishiga olib kelishi mumkin. 

“Boshoqli o‘simliklar qayta ishlanganda biriktiruvchi to‘qima va boshqa oziqaviy moddalar chiqindiga chiqariladi. Bundan tashqari, rafinadlangan mahsulotlar yuqori glikemik indeksga ega, shu sababli ular kamroq darajada oziqaviy”, deb qo‘shimcha qilgan boshqa bir parhezshunos Mariya Merino.

Mutaxassislarning ta'kidlashicha, kolbasa mahsulotlarini yeyishdan qochish kerak, chunki ular yarmiga qo‘shimchalar, kraxmal va boshqa moddalardan tashkil topgan.

Shuningdek, yog‘sizlantirilgan sut mahsulotlaridan voz kechish tavsiya qilinadi. Parhezshunoslar yog‘ miqdori kam bo‘lgan sut va sut mahsulotlari odatda shakar saqlashi va oziqaviyligi pastligini ta'kidlashmoqda.   

Shuningdek, vaqti-vaqti bilan pishiriq, sneklar va yarimfabrikatlar, etiketkasida “past kaloriyali”, “zero” va “shakarsiz” yozuvi bo‘lgan mahsulotlar, spirtli ichimlik va qayta ishlangan go‘shtni  iste'mol qilmaslik lozim.