Prokuratura maʼlumotlariga koʻra, Manfred D. Xanningga maxfiy maʼlumotlarni uzatib turgan, u esa oʻz navbatida ushbu maʼlumotlardan konsalting faoliyatida, jumladan, xorijiy razvedka xodimlariga berish uchun foydalangan. Gap qaysi davlatlar haqida ketayotgani hamda Xanning Rossiyaga maʼlumot bergan-bermagani hozircha nomaʼlum.
BBC xabariga koʻra, 80 yoshli Xanning Shimoliy Reyn-Vestfaliyada, 64 yoshli Manfred D. esa Bavariyada qoʻlga olindi. Shu bilan bir vaqtda ularning uyida, shuningdek, Berlinda ham tintuvlar oʻtkazildi.
Avgust Xanning 1998-yildan 2005-yilgacha Germaniya Federal razvedka xizmati (BND) rahbari boʻlgan, 2005-yil dekabridan 2009-yil noyabrigacha esa Ichki ishlar vazirligi davlat kotiblaridan biri sifatida ishlagan. Manfred D. bu davr mobaynida Xanning apparati rahbari sifatida faoliyat yuritgan. 2012-yil martidan 2026-yil martigacha esa u BND boshqa rahbarlari apparatiga rahbarlik qilgan.
Prokuratura talqiniga koʻra, 2010-yil bahorida Xanning D.dan razvedka maʼlumotlarini taqdim etib turishini soʻragan. Razvedkaning sobiq rahbari bu maʼlumotlardan boylik orttirish maqsadida oʻzining xususiy konsalting faoliyatida foydalanmoqchi boʻlgan.
Manfred D. 2022-yil iyuniga qadar Xanningga 2 mingtaga yaqin hujjatni topshirgan. Ularning aksariyati maxfiy boʻlib, faqat BND ichida foydalanish uchun moʻljallangan edi. Xanning qoʻlga kiritgan maʼlumotlar BND rahbariyati uchun va mamlakat oliy rahbariyati bilan oʻtkaziladigan muntazam brifinglarda foydalanish maqsadida tayyorlangan.
Prokuraturaning taʼkidlashicha, holatlardan birida Xanning xorijiy davlat maxsus xizmati xodimining buyurtmasiga binoan tahliliy material tayyorlash uchun Manfred D.dan olingan maxfiy maʼlumotlardan foydalangan. Idora gap aynan qaysi davlat haqida ketayotganiga oydinlik kiritmadi.
Bundan tashqari, ayblov tomonining maʼlum qilishicha, Xanning boshqa bir xorijiy maxsus xizmat xodimi bilan ham faol aloqada boʻlgan. BND sobiq rahbari bir necha yil davomida uni qisman Manfred D.dan olingan materiallarga asoslangan siyosiy maʼlumotlar bilan taʼminlab kelgan.
Taʼkidlanishicha, Xanning qoʻliga tushgan hujjatlarda, xususan, Eron yadro dasturi va Rossiya armiyasiga doir maʼlumotlar boʻlgan.
Xanning taxminan bir yil oldin butunlay boshqa bir ish boʻyicha politsiya eʼtiboriga tushgan edi.
