Qoʻshimcha funksionallar
-
Tungi ko‘rinish
Aksiyadorlik jamiyatlari mulklari arzon-garov sotib yuborilishiga chek qo‘yiladi
Endilikda aksiyadorlik jamiyatlari mulklarining past narxlarda davlat tomonidan olib qo‘yilishi va sotilib ketishiga chek qo‘yiladi. Bu Kapital bozorini rivojlantirish agentligi fevral oyida ishlab chiqqan qonun loyihasida ko‘zda tutilgan.
Loyiha hukumat tomonidan Oliy Majlisga kiritilgan, deya xabar bermoqda agentlik axborot xizmati. Xabarda qayd etilishicha, ayni paytda aksiyadorlik jamiyatlari mulkining balans qiymati asosida past narxlarda baholanib sotilib ketishi va bundan aksiyadorlar zarar ko‘rishi holatlari amalda kuzatilmoqda. Bunday holatlar minoritar (ulushi kichik bo‘lgan) aksiyadorlarning qonuniy manfaatlariga zid bo‘lib, investitsiya muhiti va mamlakatning xalqaro maydondagi imijiga salbiy ta'sir ko‘rsatishi mumkin.
Mazkur muammoning oldini olish va aksiyadorlarni himoya qilish uchun agentlik tomonidan ishlab chiqilgan qonun loyihasida «Aksiyadorlik jamiyatlari va aksiyadorlarning huquqlarini himoya qilish to‘g‘risida»gi qonunga bir qator o‘zgartirishlar kiritilishi ko‘zda tutilgan.
Unga ko‘ra, aksiyadorlik jamiyatlari rahbariyati qandaydir yirik bitim tuzmoqchi (jamiyat mulkini sotmoqchi) bo‘lsa, buning uchun bitim shartlarini mustaqil auditorlik kompaniyasini jalb qilgan holda o‘rganishga majbur bo‘ladi. Auditor esa bitimda ko‘rsatilgan mulkning bozor narxini hisobga olishi shart.
Xuddi shunday tartib jamiyat mulkini o‘sha jamiyatga aloqador shaxs (affillangan shaxs) sotib olayotganida ham qo‘llanilishi shart. Misol uchun, agar qaysidir hokimlik davlat ulushi bor aksiyadorlik jamiyatlari hisobidagi mulkni davlat balansiga olmoqchi bo‘lsa, oldingidek mulkning balans qiymati asosida past narxda emas, bozor narxida kompensatsiya to‘lashga majburlanadi.
“Ushbu qonunning qabul qilinishi aksiyadorlik jamiyatlarida ulushi kam bo‘lgan kichik aksiyadorlar huquqlari va qonuniy manfaatlari himoyasini kuchaytirishga xizmat qiladi”, deyiladi xabarda.
Shuningdek, xabarda Kapital bozori agentligi aksiyador va investorlardan o‘z huquqlari va manfaatlari buzilgan hollarda zarur choralarni o‘z vaqtida ko‘rish uchun Agentlikka murojaat qilishlarini so‘ragani ta'kidlangan.
Eslatib o‘tamiz, yaqinda Jahon banki e'lon qilgan “Doing Business 2020” reytingida O‘zbekiston minoritar investorlarni himoya qilish bo‘yicha so‘nggi yil ichida 64-o‘rindan 37-o‘ringa ko‘tarilgandi.
