O‘zbekistonlik startapchilar Qozog‘istonda qo‘shma korxona tashkil etish to‘g‘risida shartnoma imzoladilar

Innovatsion rivojlanish vazirligi matbuot xizmatining xabar berishicha, “Agrowin” va “N.E.F.” startap-korxonalari vakillari USAID dasturining Markaziy Osiyoda raqobatbardoshlik, savdo va ish o‘rinlarini yaratish loyihasi taklifiga binoan Qozog‘istonning Chimkent shahrida o‘tkazilgan IX Markaziy Osiyo savdo forumida ishtirok etgan.

Bu startap-korxonalar Innovatsion rivojlanish vazirligi tomonidan o‘tkazilgan startap loyihalar tanlovi g‘olibi bo‘lgan edi.

IX Markaziy Osiyo savdo forumining mavzusi “Meva-sabzavot sohasidagi innovatsiyalar va investitsion yondashuvlar“ bo‘lib, unda Markaziy va Janubiy Osiyo, Yevropa va AQSh Davlat sektori vakillari va soha mutaxassislari ishtirok etdi.

Mazkur forum doirasida N.E.F.” startap-korxonasi Qozog‘iston meva-sabzavotchilik ilmiy-tadqiqot institutining “Sariagash“ mintaqaviy filiali bilan qo‘shma korxona tashkil etish bo‘yicha shartnoma imzoladi.

“N.E.F.” (“New ecological feed” – “Yangi ekologik ozuqa”) qoramol, qo‘y, quyon, parranda, baliq uchun yem mahsulotlari tayyorlashning yangi texnologiyasini ishlab chiqarishga joriy etgan. Mazkur startap jamoasi vitaminlarga boy omixta ozuqalar, parranda, chorva yoki boshqa hayvon turlarining ehtiyojlaridan kelib chiqqan holda yem mahsulotlari va qo‘shimchalar tayyorlash, qishki mavsumda chorva uchun barra o‘t yetishtirish bilan shug‘ullanadi.

Hamkorlikning maqsadi tashkilotlarning texnik salohiyatini birlashtirish, tajriba almashish va “N.E.F - Yangi ekologik ozuqa“ hamda Qozog‘iston meva-sabzavotchilik ITIning “Sariagash“ mintaqaviy filiali o‘rtasida ikki tomonlama o‘zaro manfaatli aloqalarni rivojlantirishdir. Shartnoma, shuningdek, vitamin mahsulotlari, omixta yem va ularning maxsus tarkibiy qo‘shimchalarini ishlab chiqarishni ko‘zda tutadi.

O‘z navbatida, “Agrowin” startap loyihasi 2019 yilda tashkil etilgan bo‘lib, “in vitro” usulida mevali, manzarali, xona ko‘chatlari va payvand taglarini ko‘paytirish bilan shug‘ullanadi.