Hukumatning 2026-yil 4-sentabrdagi 463-son qarori bilan “Eng innovatsion gʻoya” respublika tanlovini oʻtkazish tartibi toʻgʻrisidagi nizom tasdiqlandi.

Nizom davlat oliy taʼlim tashkilotlarining iqtidorli talabalari oʻrtasida tanlov oʻtkazish, startap loyihaga aylantirish imkoniyati yuqori boʻlgan innovatsion gʻoyalarni saralash va ularni moliyalashtirish tartibini belgilaydi.

Hujjatga koʻra, “Eng innovatsion gʻoya” tanlovi har yili sentabr–dekabr oylarida ikki bosqichda tashkil etiladi.

Birinchi bosqich barcha davlat oliy taʼlim tashkilotlarida oʻz talabalari oʻrtasida oʻtkaziladi. Respublika bosqichi esa Innovatsion rivojlanish agentligi tomonidan 10 ta yoʻnalish boʻyicha tashkil etiladi.

Oliy taʼlim tashkilotlari har yili 10-sentabrda tanlovning birinchi bosqichiga arizalar qabul qilish boshlangani haqida eʼlon beradi. Talabgorlar 10-oktabrga qadar saralash komissiyasi nomiga ariza taqdim etishi mumkin.

Har bir talabgor tanlovda faqat bitta innovatsion gʻoya bilan ishtirok etadi.

Gʻoyalar 100 ballik tizimda baholanadi

Tanlovga taqdim etilgan innovatsion gʻoyalar saralash va tanlov komissiyalari tomonidan 100 ballik tizim asosida baholanadi.

Bunda innovatsion gʻoyaning ilmiy va innovatsion yangiligi uchun 20 ballgacha, dolzarbligi uchun 20 ballgacha, mavjud analoglardan farqi uchun 20 ballgacha, xarajatlar smetasining asoslanganligi uchun 20 ballgacha hamda gʻoyani amalga oshirishdan kutilayotgan natijalar uchun 20 ballgacha beriladi.

Birinchi bosqich gʻoliblariga 50 mln soʻmgacha grant

Tanlovning birinchi bosqichida gʻolib boʻlgan talabalar grant mablagʻlari bilan taqdirlanadi.

Xususan, birinchi oʻrin uchun 50 mln soʻm, ikkinchi oʻrin uchun 30 mln soʻm va uchinchi oʻrin uchun 20 mln soʻm grant ajratiladi.

Respublika bosqichida gʻolib deb topilgan innovatsion gʻoyalarga esa ancha katta mablagʻ yoʻnaltiriladi. Innovatsion rivojlanish agentligi, talabgor va tegishli tashkilot oʻrtasida tuziladigan shartnoma asosida birinchi oʻrin sohibining gʻoyasi 500 mln soʻm, ikkinchi oʻrin - 300 mln soʻm, uchinchi oʻrin - 200 mln soʻm miqdorida moliyalashtiriladi.