Vidal «Barselona»ni sudga berdi

«Barselona» yarimhimoyachisi Arturo Vidal o‘z klubi rahbariyati bilan sudlashadi.

Futbolchi Kataloniya klubini shartnomada ko‘rsatilgan 2,4 mln yevro miqdoridagi mukofot pullarini to‘lamaganlikda ayblamoqda.

Gap shundaki, agar chililik futbolchi mavsumning 60 foiz o‘yinida kamida 45 daqiqa harakat qilsa, 2 mln yevro mukofot olishi mehnat bitimida belgilab qo‘yilgan. Ammo Vidal bu shartni faqat o‘yinlarning yarmisida bajargan. Shu tufayli klub unga mukofot berishni istamayapti. Ammo futbolchining advokatlari mukofotning 50 foizini talab qilishmoqda.

Da'vo qiymatining qolgan qismi Chempionlar Ligasi va Ispaniya chempionatidagi g‘alabalar bilan bog‘liq.

Avvalroq, 32 yoshli Vidal xizmatiga «Inter» va «Yuventus» klublari qiziqish bildirayotgani haqida xabarlar tarqalgan edi.