Eronda ukrainlarning yo‘lovchi samolyoti quladi. Bortdagilarning barchasi halok bo‘ldi

Bu haqda birinchi bo‘lib xabar tarqatgan «Tasnim» axborot agentligi aviahalokat «texnik nosozlik» tufayli ro‘y berganini ma'lum qildi.

Voqea joyiga darhol qutqaruvchilar yetib kelishdi. Ammo Erondagi «Qizil yarimoy» jamiyati vakillari halokatdan omon qolganlar yo‘qligini ma'lum qilishdi. Samolyotda qancha kishi bo‘lgani haqida aniq ma'lumot yo‘q - 167dan 180gacha bo‘lgan raqamlar aytilmoqda. Yo‘lovchilar turli davlatlar fuqarolari bo‘lgan. Eron qutqaruv xizmati rahbari Pirhusayn Kulivand davlat televideniyesiga bergan intervyusida bortda bo‘lganlarning barchasi halok bo‘lgani, qutqaruvchilar qurbonlarning jasad qoldiqlarini yig‘ish bilan shug‘ullanayotganini ma'lum qildi.

Erondagi ijtimoiy tarmoqlarda samolyot qulashi tasvirlangan videoyozuvlar tarqaldi.

Ma'lum bo‘lishicha, samolyot «Ukraina xalqaro avialiniyalari»ga (MAU) tegishli bo‘lgan. 

Flightradar24 servisi ma'lumotlariga ko‘ra, samolyot joylashuvi haqidagi so‘nggi ma'lumot u Tehron yaqinidagi Parand shahri ustidan uchib o‘tayotgan vaqtda olingan.

We are following repors that a Ukrainian 737-800 has crashed shortly after takeoff from Tehran. #PS752 departed Tehran at 02:42UTC. Last ADS-B data received at 02:44UTC. https://t.co/qXWHUPGDTu pic.twitter.com/vuAi6TOqTp

— Flightradar24 (@flightradar24) January 8, 2020

MAU saytida Tehrondan Kiyevga uchgan PS752 reysi mahalliy vaqt bilan 5:15 da (Toshkent vaqti bilan 6:45da) uchib ketgani ko‘rsatilgan.

Pervyye sekundy posle padeniya ukrainskogo «Boinga»:https://t.co/Hpykb9A09F pic.twitter.com/IbVvSq0zn0

— Ilya Varlamov (@varlamov) January 8, 2020

Ushbu halokat Yaqin Sharqda AQSh-Eron munosabatlarida yuzaga kelgan eskalatsiya bilan ham bog‘lanmoqda. Bugun tongda, ushbu aviahalokat bilan bir vaqtda Eron qurolli kuchlari AQShning Iroqdagi bazalariga raketalar bilan zarba berdi. Uchirilgan 15ta raketadan 11tasi nishonga borib tekkan. Ayni vaqtda bu raketalardan biri samolyotga tegib ketgan bo‘lishi mumkinligi haqida taxminlar bildirilmoqda.

RIA «Novosti» Tehron aeroportidagi rasmiy manbaga asoslanib xabar berishicha, samolyot halokatiga dvigatelda yong‘in chiqishi sabab bo‘lgan.

Ukraina prezidenti Vladimir Zelenskiy samolyot halokati bo‘yicha bayonot berdi:

«Yaqin Sharqdan qo‘rqinchli xabar. Bugun Imom Xumayniy aeroportidan (Tehron shahri) havoga ko‘tarilgan «Ukraina xalqaro avialiniyalari» aviakompaniyasi yo‘lovchi samolyoti halokatga uchragan va aeroport yaqinida qulab tushgan.

So‘nggi ma'lumotlarga ko‘ra, barcha yo‘lovchilar va ekipaj a'zolari halok bo‘lishgan. Elchixonamiz fojia tafsilotlariga va qurbonlar ro‘yxatiga aniqlik kiritmoqda. Halok bo‘lgan yo‘lovchilar va ekipaj a'zolarining yaqinlariga chuqur hamdardlik bildiraman».

Ukraina prezidenti Ummonga ta'tilini barvaqt yakunlab, Kiyevga qaytgan.

Qulagan samolyotning qora qutisi topilgan.

Bu vaqtda Eron hukumati davlat televideniyesi orqali AQShga yangi zarbalar bilan tahdid qilmoqda.