Eron Hoʻrmuz boʻgʻozidan oʻtish boʻyicha belgilangan qoidalarga rioya qilmagan kemalarga nisbatan cheklovlarni kuchaytirishini maʼlum qildi.
23-avgust kuni Eronning Fors koʻrfazi boʻgʻozlari maʼmuriyati (PGSA) ijtimoiy tarmoqda tarqatgan bayonotida qoidabuzar kemalar keyingi safar Hoʻrmuz boʻgʻozidan oʻtishda turli cheklovlarga duch kelishi mumkinligini bildirdi.
Jumladan, bunday kemalarga jarima solish, ularni ushlab turish va ayrim hollarda musodara qilish choralari qoʻllanishi mumkinligi aytilgan.
Eron tomoni, shuningdek, Fors koʻrfazi akvatoriyasiga yoki undan tashqariga yuk tashish bilan shugʻullanuvchi kompaniyalarni kemani ijaraga olishdan oldin qoidabuzarlar roʻyxatini tekshirishga chaqirdi.
Tegishli internet sahifasida Tehron Hoʻrmuz boʻgʻozidan oʻtish talablarini buzgan deb hisoblayotgan kemalar roʻyxati ham eʼlon qilingan.
AQSH maxfiy dengiz yoʻlagini tashkil etgani aytilmoqda
Avvalroq, 19-avgust kuni Axios nashri AQSH Qurolli kuchlari Hoʻrmuz boʻgʻozi orqali kemalar harakatini taʼminlash uchun maxfiy dengiz yoʻnalishini tashkil etgani haqida xabar bergan edi.
Nashr maʼlumotlariga koʻra, Ummon sohillari yaqinidagi janubiy kanal orqali har kecha 15–20 ta tanker harakatlanmoqda. Ular orqali jahon bozoriga kuniga qariyb 10 mln barrel neft yetkazib berilayotgani aytilgan.
Bu urushdan oldin Hoʻrmuz boʻgʻozi orqali tashilgan neft hajmining taxminan yarmiga teng.
Axios AQSH prezidenti Donald Tramp maʼmuriyati rasmiylariga tayanib, ushbu yetkazib berishlar jahon neft bozoriga «sezilarli taʼsir» koʻrsatayotganini yozgan.
Tramp Eron bilan savdo qiluvchi davlatlarni sanksiyalar bilan ogohlantirgan
Bundan avval AQSH prezidenti Donald Tramp Eronga qarshi keng koʻlamli iqtisodiy bosim boshlanganini eʼlon qilgan edi.
U Tehronni qoʻllab-quvvatlaydigan yoki Eron bilan biznes aloqalarini davom ettiradigan har qanday davlatga nisbatan katta miqdordagi sanksiyalar joriy qilinishi mumkinligini aytgan.
Tramp, shuningdek, ayni paytda Vashington va Tehron oʻrtasida muzokaralar olib borilmayotganini taʼkidlagan.
