AQSh va Xitoy savdo kelishuvini imzoladi

AQSh prezidenti Donald Tramp va Xitoy davlat kengashi bosh vaziri o‘rinbosari Lyu Xe savdo kelishuvining birinchi bosqichi haqidagi kelishuvni imzoladi. Bu haqda Reuters axborot agentligi xabar berdi.  

Hujjatni imzolash marosimi Oq uyda bo‘lib o‘tgan. «Muzokaralar keskin o‘tdi», degan Tramp va yaqin orada Xitoyga tashrif buyurmoqchiligini qo‘shimcha qilgan.

Trampning ta'kidlashicha, kelishuv intellektual mulkni kuchli himoyalash  choralarini ko‘zda tutadi. Shuningdek, kelishuv tufayli amerikalik fermerlar o‘z mahsulotlarini katta miqdorda sota oladilar. 

Hujjatga ko‘ra, tomonlar Xitoyning 2 yil ichida AQShdagi mahsulotlar va xizmatlarga xarajatlari 200 mlrd dollarni tashkil qilishiga kelishib olgan. O‘z navbatida, AQSh kelishuvning 2-bosqichi ishlab chiqilgachgina Xitoy tovarlariga bojlarni bekor qilishga kelishgan.

AQSh va Xitoy o‘rtasidagi savdo mojarolari so‘nggi ikki yildan buyon davom etmoqda. Bunga Tramp Xitoy tovarlariga boj joriy etgani sabab bo‘lgandi - Pekin ham shunday yo‘l tutib, Amerika tovarlariga boj joriy etgan.