XMK O‘zbekistonga to‘lov tizimi zamonaviy standartlarini joriy etishda yordam ko‘rsatadi

Joriy yilning 2 mart kuni Markaziy bankda Xalqaro moliya korporatsiyasi (XMK) missiyasi bilan uchrashuv o‘tkazildi. Bu haqda MB matbuot xizmati xabar bermoqda.

Qayd etilishicha, uchrashuvda naqd pulsiz to‘lovlar hamda ularni tartibga solish, shuningdek, elektron pullar emitentlarini nazorat qilish tizimini rivojlantirish masalalari muhokama etildi.

XMK vakillari O‘zbekistonda to‘lov tizimining zamonaviy standartlarini joriy etishda, fintex kompaniyalarining mahalliy bozorga kirishlarini erkinlashtirish borasida texnik yordam ko‘rsatishga tayyor ekanliklarini bildirishdi.

Bundan tashqari, Markaziy bankning tegishli departamentlari va XMK vakillarining moliyaviy xizmatlar iste'molchilarini masofadan turib identifikatsiya qilish, mamlakatdagi to‘lov tizimi holati, bank kartalari orqali to‘lovlarni amalga oshirish tizimi va amaldagi to‘lov tizimida xizmatlar turini kengaytirish masalalarida amaliy uchrashuvlari bo‘lib o‘tdi.