Oʻzbekistonda real ish haqi 11 foizga oshdi - Markaziy bank

Ish haqining real oʻsishi hududlar boʻyicha ham bir xil boʻlmagan. Real ish haqining eng yuqori oʻsishi Jizzax viloyatida - 13,3 foizni tashkil qilgan.

Undan keyingi oʻrinlarda:

• Namangan viloyati - 11,8 foiz,

• Toshkent shahri - 10,7 foiz,

• Real ish haqining eng past oʻsishi esa Andijon viloyatida - 7,9 foiz qayd etilgan.

• Qoraqalpogʻistonda real ish haqi 8,7 foizga oshgan.

  

Ish haqi oʻsishi nimani anglatadi?

Markaziy bank maʼlumotlariga koʻra, ish haqining yuqori surʼatlarda oʻsishi aholi daromadlari va xarid qobiliyatiga ijobiy taʼsir koʻrsatmoqda.

Ayniqsa nominal ish haqi 18,4 foizga oshishi fonida real ish haqining ham 10,9 foizga koʻpaygani muhim. Yaʼni ish haqi oʻsishi faqat narxlar qimmatlashishi hisobidan yuzaga kelmagan - inflyatsiya taʼsiri chiqarib tashlanganda ham aholining real daromadi oshgan.

Biroq ish haqi oʻsishi barcha sohalarda bir xil emas. Yuqori malaka talab qiladigan moliya, sugʻurta, axborot va kommunikatsiya sohalarida ish haqi mamlakat oʻrtacha koʻrsatkichidan bir necha baravar yuqori boʻlib qolmoqda.

Vakansiyalar soni qisqarmoqda 

Ish haqi oʻsayotgan bir paytda mehnat bozorida ishchi kuchiga talabning ayrim koʻrsatkichlari susaygan.

2026-yil II choragida biznes subyektlari tomonidan eʼlon qilingan boʻsh ish oʻrinlari soni oʻtgan yilning mos davriga nisbatan 9,8 foizga qisqargan. Asosiy pasayish chakana savdo, ishlab chiqarish va boshqa yoʻnalishlar hissasiga toʻgʻri kelgan. Markaziy bank soʻroviga koʻra, ish oʻrinlari sonini oshirishni kutayotgan biznes subyektlari ulushi mart oyidagi 40 foizdan iyunda 34 foizgacha kamaygan. Aksincha, ish oʻrinlarini qisqartirishni kutayotgan tadbirkorlar ulushi I chorakdagi oʻrtacha 6,6 foizdan II chorakda 9,2 foizga oshgan. Shuningdek, talabning ishlab chiqarish va qurilish kabi kapital sigʻimi yuqori tarmoqlardan mehnat sigʻimi yuqori xizmat koʻrsatish sohalariga siljishi kutilmoqda.

Bandlik oʻsishida rekord koʻrsatkich

Ayni paytda, bandlik boʻyicha vaziyat ijobiyligicha qolmoqda.

2026-yil I choragida iqtisodiyotda bandlar soni oʻtgan yilning mos davriga nisbatan 5,2 foizga oshgan. Markaziy bank bu soʻnggi toʻrt yildagi eng yuqori oʻsish ekanini qayd etgan. Oʻsish asosan sanoat va xizmatlar, xususan, axborot va aloqa, moliya va sugʻurta sohalari hisobiga taʼminlangan. Qishloq xoʻjaligida bandlikning qisqarib, xizmatlar sohasida ortib borayotgani esa ishchi kuchining nisbatan yuqori unumdorlikka ega tarmoqlarga koʻchishi davom etayotganini koʻrsatmoqda.

Eslatib oʻtamiz, 2026-yilning birinchi choragida Oʻzbekistonda oʻrtacha oylik ish haqi 6 mln 825 ming soʻmni tashkil etib, oʻtgan yilning mos davriga nisbatan 17,4 foiz oʻsish qayd etilgandi.