Oʻzbekiston Markaziy banki 2026-yil II chorak uchun mehnat bozori sharhini eʼlon qildi. Unda tashqi mehnat migratsiyasidagi tendensiyalar ham keltirib oʻtilgan.
Qayd etilishicha, 2026-yilning yanvar-iyun oylarida Rossiyaga ishlash maqsadida borgan Oʻzbekiston fuqarolari soni 1,18 mln nafarni tashkil etdi. Bu - 2025-yilning mos davriga nisbatan 13,2 foizga kam. Patent asosida ishlayotgan oʻzbekistonliklar soni esa 9,2 foizga qisqargan.
Shu bilan birga, oʻzbekistonlik mehnat migrantlari uchun boshqa yoʻnalishlarning ahamiyati ortib bormoqda. Markaziy bank maʼlumotlariga koʻra, Turkiya, Janubiy Koreya, Yevropa va AQShdagi oʻzbekistonliklar soni soʻnggi yillarda sezilarli koʻpaygan.
Migrantlar oqimining yuqori oʻsishi asosan Yevropa va Turkiya hissasiga toʻgʻri keldi. 2025-yilda Yevropa Ittifoqidagi oʻzbekistonlik migrantlar soni 13,2 foizga, Turkiyada esa 10,7 foizga oshdi. 2026-yilning 1-iyul holatiga Turkiyadagi oʻzbekistonliklar soni 70 ming nafarni (9,3 foiz oʻsish) tashkil etgan boʻlsa, Janubiy Koreyadagilar soni 102,2 ming nafarga (3,3 foiz oʻsish) teng boʻldi.
Migrantlar tomonidan Oʻzbekistonga yuborilayotgan pul oʻtkazmalari oʻsishda davom etgan. 2027-yil I choragida pul oʻtkazmalari 3,8 mlrd dollarni tashkil etib, yillik hisobda 12,9 foizga oshgan. II chorakda esa ushbu koʻrsatkich 5,5 mlrd dollarga yetib, oʻsish surʼati 13,1 foizni tashkil qilgan.
Pul oʻtkazmalari geografiyasi ham kengaymoqda. Yanvar-iyun oylarida Qozogʻistondan kelgan pul oʻtkazmalari 28,2 foizga, AQShdan 18,8 foizga, Turkiyadan 14,2 foizga va Janubiy Koreyadan 11,4 foizga oshgan. Rossiyadan kelayotgan pul oʻtkazmalari esa 8,8 foizga koʻpaygan.
Eslatib oʻtamiz, 2026-yilning birinchi choragida umumiy pul oʻtkazmalari tarkibida Rossiyadan joʻnatilgan mablagʻlar ulushi bir yil oldingidan 5,2 punktga pasayib, 72,4 foizga tushgandi
