Toshkent IEMda quvvati 27 MVt bo‘lgan ikkita bug‘-gaz qurilmasi quriladi 

Vazirlar Mahkamasining “Toshkent issiqlik elektr markazida quvvati 27 MVt bo‘lgan ikkita bug‘-gaz qurilmasini qurish” investitsiya loyihasini amalga oshirish chora-tadbirlari to‘g‘risida”gi qarori loyihasi muhokama uchun joylashtirildi.

Qayd etilishicha, quyidagilar:

2015 yil 25 oktyabrda O‘zbekiston Respublikasi va Yaponiya xalqaro hamkorlik agentligi (JICA) o‘rtasida “Toshkent kogeneratsion issiqlik elektr stansiyasini qurish” investitsiya loyihasini moliyalashtirish uchun 10 yil imtiyozli davrga 40 yilda qoplash muddati bilan umumiy qiymati 12,0 milliard yapon iyenasi bo‘lgan I-II-tarkibiy qismlardan tashkil topgan UZB–P15-son qarz kelishuvi imzolangan;

“tayyor holda topshirish” shartlari bilan qurilish ishlari shartnomasi uchun yillik 0,1 foiz stavkada (I-tarkibiy qism);

konsultatsiya xizmatlarini ko‘rsatish shartnomasi uchun yillik 0,01 foiz stavkada (II-tarkibiy qism).

2019 yil 18 iyulda “Toshkent Issiqlielektrmarkazi” AJ va “TRACTEBEL Engineering GmbH” (Germaniya) va “EURASIAN Consulting and Engineering Services GmbH” (Germaniya) qo‘shma korxonasi o‘rtasida “Toshkent issiqlik elektr markazida quvvati 27 MVt bo‘lgan ikkita bug‘-gaz qurilmasini qurish” investitsiya loyiha doirasida umumiy qiymati 6,54 mln. AQSh dollari ekvivalentiga teng bo‘lgan konsultatsiya xizmatini ko‘rsatish shartnomasi imzolagan;

Prezidentning “Xalqaro moliya institutlari va xorijiy hukumat moliya tashkilotlari ishtirokidagi loyihalarni tayyorlash va amalga oshirish samaradorligini oshirish chora-tadbirlari to‘g‘risida” 2018 yil 16 iyundagi PQ–3857-son qaroriga muvofiq xalqaro moliya institutlari va xorijiy hukumat moliya tashkilotlari ishtirokidagi loyihalarni amalga oshirish doirasida soliq va bojxona imtiyozlari taqdim qilinadi;

loyihaning amalga oshirish muddati 3 yil (2020-2023 yillar) etib belgilangan.

Energetika vazirligi, Moliya vazirligi, Investitsiyalar va tashqi savdo vazirligi hamda “Issiqlik elektr stansiyalari” AJning UZB–P15-son qarz kelishuvi mablag‘larini loyihani amalga oshirishga yo‘naltirish to‘g‘risidagi taklifi ma'qullanishi mumkin.

Quyidagilar tasdiqlanadi:

“Toshkent issiqlik elektr markazida quvvati 27 MVt bo‘lgan ikkita bug‘-gaz qurilmasini qurish” investitsiya loyihasini texnik-iqtisodiy asoslanuvining asosiy texnik-iqtisodiy ko‘rsatkichlari;

“Toshkent issiqlik elektr markazida quvvati 27 MVt bo‘lgan ikkita bug‘-gaz qurilmasini qurish” investitsiya loyihasi doirasida asbob-uskunalar va materiallarni xarid qilish, qurilish-montaj ishlarini bajarish va konsalting xizmatlarini ko‘rsatish uchun jalb qilinadigan JICA qarzini qaytarish, kredit bo‘yicha asosiy qarzni qoplash, foizlarni va komissiya to‘lovlarini amalga oshirish prognoz jadvali.

Belgilab qo‘yilishicha:

“Issiqlik elektr stansiyalari” AJ loyihaning amalga oshirilishini muvofiqlashtirish va monitoring qilish yuzasidan mas'ul ijro etuvchi hisoblanadi;

“Toshkent Issiqlielektrmarkazi” AJ JICAning qarzdan maqsadli foydalanish va loyihani samarali amalga oshirish uchun mas'ul bo‘lib hisoblanadi;

JICA qarz qaytarish bilan bog‘liq bo‘lgan barcha xarajatlarni qoplash “Toshkent Issiqlielektrmarkazi” AJning mablag‘lari hisobidan amalga oshiriladi.

Tashqi ishlar vazirligi “Toshkent Issiqlielektrmarkazi” AJ va “Issiqlik elektr stansiyalari” AJ arizalariga binoan Loyihani amalga oshirish jarayonida ishtirok etayotgan xorijiy mutaxassislarni yashab turish joyi bo‘yicha ko‘p marotabalik vizalar va vaqtinchalik ro‘yxatdan o‘tishlari davlat boji undirilmasdan amalga oshirilishini ta'minlaydi.

Ichki ishlar vazirligi “Toshkent Issiqlielektrmarkazi” AJ va “Issiqlik elektr stansiyalari” AJning arizalariga binoan loyihani amalga oshirishda ishtirok etayotgan xorijiy mutaxassislarning yashash joyi bo‘yicha davlat boji undirmagan holda ko‘p martalik vizalar va vaqtincha yashash uchun ruxsatnomalar berish hamda ularni uzaytirishni ta'minlaydi.