Toshkentda avtobuslar harakati kamaytiriladi

“Toshshahartransxizmat” AJ tasarrufidagi yo‘nalishlarda qatnayotgan avtobuslar harakat jadvaliga vaqtinchalik o‘zgartirishlar kiritildi. 

“Toshshahartransxizmat” xabariga ko‘ra, 2020 yilning 19 martidan boshlab yo‘lovchi oqimi keskin kamaygan vaqtlar –  soat 10:00dan 16:00ga qadar avtobuslar harakati oraliq intervallari uzaytirilmoqda. 

Bildirilishicha, bundan maqsad transport vositalaridan samarali foydalanishdir.

Ta'kidlanishicha, bugun butun dunyoni tashvishga solayotgan koronavirus infeksiyasi O‘zbekistonda ham qayd qilingani ushbu xastalikka nisbatan hukumat darajasida qarshi choralar ko‘rishni taqozo etdi. Ayni kunda O‘zbekistonda karantin e'lon qilingan bo‘lib, ushbu vaqtda virusning keng tarqalmasligi uchun barcha zarur chora-tadbirlar amalga oshirilmoqda. Toshkent shahriga kelib ishlayotgan, ta'lim olayotgan yurtdoshlarimiz va xorijiy mehmonlarning poytaxtda bo‘lishlari vaqtincha cheklanmoqda. 

Jamoat transportida yo‘lovchi oqimining keskin qisqarishi natijasida tig‘iz vaqtlardan tashqari avtobuslarning yo‘nalishlarda yo‘lovchisiz harakatlanishi ham kuzatilayotgani aytiladi. Bu transport vositalarining sababsiz yemirilishiga, yoqilg‘i-moylash mahsulotlarining samarasiz sarflanishiga sabab bo‘layotgani qayd etilgan.