AQSh senati amerikaliklarga 1200 dollardan pul tarqatish va kichik biznesga 350 mlrd dollar ajratilishini ma'qulladi

AQSh senati 2 trln dollarni tashkil etuvchi inqirozga qarshi choralar paketini ma'qulladi. Bu haqda Bloomberg xabar bermoqda.

Qonun loyihasi ushbu haftada ovoz berish uchun vakillar palatasiga qo‘yiladi.

Unga ko‘ra, hukumat yoshi katta amerikaliklarga 1200 dollardan pul to‘laydi. Birgalikda ariza bergan er-xotinga 2400 dollar beriladi. Farzandli oilalarga har bir farzandi uchun 500 dollardan to‘lanadi. Yordam miqdori fuqarolarning daromadiga mos bo‘ladi — topishi yaxshi bo‘lganlar ozroq pul oladi. Bir yilda 99 ming dollardan ortiq daromad topadiganlarga pul berilmaydi. 

Ishsizlik nafaqasi haftasiga 600 dollarga oshiriladi. Ishsizlarga yordam uchun jami 250 mlrd dollar mablag‘ yo‘naltiriladi.

Koronavirus pandemiyasi sababli zarar ko‘rgan kompaniyalarga kredit va yordam berish uchun 500 mlrd dollarga yaqin mablag‘ ajratiladi. Kichik biznesga o‘z xodimlarini qisqartirmaslik sharti bilan 350 mlrd dollar beriladi.

Milliy xavfsizlik uchun o‘ta muhim hisoblangan kompaniyalar 17 mlrd dollar oladi. Aviakompaniyalar, yuk tashuvchilar va ularning pudratchilariga grant va kreditlar ko‘rinishida 57 mlrd dollar ajratiladi.

Kasalxona va tibbiy xarajatlar uchun qo‘shimcha moliyalashtirish miqdori 150 mlrd dollarni tashkil etadi. Dori-darmonlar zaxirasini to‘ldirish uchun 16 mlrd dollar, vaksina va koronavirus infeksiyasini aniqlovchi testlarni ishlab chiqarishni tezlashtirish uchun 3,5 mlrd dollar ajratiladi.

Mahalliy hokimiyatlar 150 mlrd dollar miqdorida yordam oladi.