Safoyev: «O‘z vaqtida choralar ko‘rilmasa, Ikkinchi jahon urushidagidan ham ko‘proq zarar ko‘rilishi mumkin»

«Darhaqiqat, bugun muammo haqida qancha gapirsak ham ko‘p bo‘lmaydi. Vaziyat murakkab. Nafaqat O‘zbekistonda, balki butun dunyoda vaziyat juda og‘ir.

Koronavirus bilan kurash bu hazilakam gap emas. Kurashimiz jiddiy bo‘lishi kerak. Hukumat barcha vazifalarni qilmoqda. Shunday bir og‘ir vaziyatda davlatimiz rahbari o‘ktamlik va jasorat bilan qarorlar qabul qilmoqda», dedi senator.

Sodiq Safoyev kutilayotgan iqtisodiy zarar miqdori va hukumat tomonidan yo‘naltirilgan mablag‘ masalasiga ham to‘xtalib o‘tdi. 

«Agar biz o‘z vaqtida choralarni ko‘rmasak, ikkinchi jahon urushidagidan ham ko‘proq zarar ko‘rishimiz mumkin. O‘zbekiston hukumati ajratgan mablag‘ ayrim boy davlatlarning koronavirusga qarshi kurash uchun ajratgan puldan ko‘p bo‘lsa ko‘pki, aslo kam emas. Hukumat koronavirusga qarshi barcha choralarni ko‘zda tutgan va maksimal darajada harakat qilmoqda», - dedi Safoyev.

Senator shunday murakkab vaziyatda O‘zbekistonning Markaziy Osiyo davlatlariga gumanitar yordam ko‘rsatishining ahamiyatiga to‘xtaldi.

«Markaziy Osiyodagi vaziyat shundayki, qo‘shnilar tinch bo‘lmasa, bu O‘zbekistonga ham o‘z ta'sirini ko‘rsatadi. Chunki, davlatlar o‘rtasida qo‘shnilik va qarindoshchilik munosabatlari bor.

Xalqaro hamjamiyat O‘zbekistonga koronavirus uchun kurashda yordam bermoqda», dedi Senat raisining birinchi o‘rinbosari.