Samarqand davlat tibbiyot universiteti tashkil etiladi

Prezidentning “Samarqand davlat tibbiyot institutida kadrlar tayyorlash tizimini tubdan takomillashtirish va samaradorligini oshirish to‘g‘risida”gi qarori loyihasi e'lon qilindi.

Sog‘liqni saqlash vazirligi, Iqtisodiy taraqqiyot va kambag‘allikni qisqartirish vazirligi hamda Oliy va o‘rta maxsus ta'lim vazirligining:

Samarqand davlat tibbiyot instituti negizida Samarqand davlat tibbiyot universitetini tashkil etish;

Samarqand davlat tibbiyot instituti birinchi va ikkinchi klinikalari negizida Universitet klinikasini tashkil etish;

Samarqand viloyati salomatlikni tiklash shifoxonasi negizida Reabilitologiya va sport tibbiyoti ilmiy tadqiqot institutini tashkil etish to‘g‘risidagi takliflariga rozilik beriladi.

Universitet Samarqand davlat tibbiyot institutining barcha huquqlari, majburiyatlari va shartnomalari bo‘yicha huquqiy vorisi hisoblanadi.

Quyidagilar Universitet faoliyatining asosiy yo‘nalishlari etib belgilanadi:

uzluksiz tibbiy – kasbiy ta'lim tizimida yuqori malakali tibbiyot kadrlarini tayyorlash, qayta tayyorlash va malakasini oshirish;

o‘quv jarayonini amaliy ko‘nikmalarni shakllantirishga yo‘naltirish, xalqaro ta'lim standartlariga asoslangan ilg‘or pedagogik texnologiyalar, o‘quv dasturlari va innovatsion o‘quv – uslubiy materiallarni keng joriy etish, klinika va o‘quv bazasi faoliyatida nazariy bilim hamda amaliyotning uyg‘unligini ta'minlash uchun zarur sharoitlar yaratish;

xorijiy tibbiyot oliy ta'lim muassasalari bilan hamkorlik doirasida talabalar, professor – o‘qituvchilar va ilmiy izlanuvchilar akademik mobilligi dasturlari hamda qo‘shma ta'lim dasturlarini rivojlantirish;

fundamental, amaliy va innovatsion ilmiy – tadqiqot ishlarini tibbiyot amaliyotidagi mavjud muammolarning yechimiga qaratish, tibbiy ta'lim, fan, innovatsiya va ilmiy tadqiqotlar natijalarining uzviy bog‘liqligini nazarda tutuvchi “Universitet 3.0” konsepsiyasini bosqichma – bosqich joriy etish;

ta'lim muassasasi va Universitet klinikalari ilmiy salohiyatini muntazam ravishda oshirib borish, professor – o‘qituvchilar va ilmiy izlanuvchilarning nufuzli xalqaro ilmiy jurnallarda maqolalar chop etishlarini ta'minlash;

respublika tibbiyot tizimi muammolarni aniqlash va bartaraf etish maqsadida muntazam ravishda ilmiy tadqiqotlar olib borish, tizimni rivojlantirish yuzasidan loyiha va tavsiyalar ishlab chiqish hamda tegishli vazirliklarga taklif sifatida kiritib borish;

respublika va xorijiy oliy ta'lim hamda ilmiy – tadqiqot muassasalari, qadrlar buyurtmachilari va homiy tashkilotlari bilan hamkorlikda tibbiyot sohasidagi dolzarb masalalarni muhokama qilish bo‘yicha xalqaro ilmiy – amaliy konferensiyalar, seminarlar va simpoziumlar tashkil etish;

talabalarda sog‘lom turmush tarzini keng targ‘ib etish uchun shart – sharoitlar yaratish, yoshlarni insonparvarlik va yuksak ma'naviy g‘oyalar asosida vatanparvarlik ruhida tarbiyalash, ularda yot g‘oya va mafkuralarga qarshi immunitetni mustahkamlash;

moddiy – texnik bazani modernizatsiya qilish va mustahkamlash, simulyatsion markaz, o‘quv va ilmiy – tadqiqot laboratoriyalarini tashkil etish va zamonaviy asbob – uskunalar bilan jihozlash.

Belgilanishicha:

Universitet klinikasi, Reabilitologiya va sport tibbiyoti ilmiy tadqiqot instituti muassisi Universitet hisoblanadi va ularning faoliyati Universitet tomonidan muvofiqlashtiriladi;

Universitet va uning tarkibiy tuzilmalariga kiritilgan ta'lim va ilmiy tadqiqot muassasalari yuridik shaxs maqomiga ega bo‘lgan davlat muassasalari hisoblanadi, O‘zbekiston Respublikasi Moliya vazirligining G‘aznachilik bo‘linmasida shaxsiy g‘azna hisobvarag‘iga, shu jumladan, xorijiy valutadagi bank hisob varaqlariga, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga, shtampga va blankalarga ega bo‘ladi;

Universitet klinikasi bosh shifokori, Reabilitologiya va sport tibbiyoti ilmiy tadqiqot instituti direktori Universitet ilmiy kengashining taqdimnomasiga ko‘ra, O‘zbekiston Respublikasi sog‘liqni saqlash vaziri tomonidan lavozimga tayinlanadi va lavozimdan ozod etiladi.

Shunday tartib o‘rnatiladiki, unga muvofiq Universitet rektori Universitetning budjetdan tashqari mablag‘lari hisobidan quyidagilarni amalga oshirish huquqiga ega:

ta'lim jarayonini samarali tashkil etish, davolash ishlariga zamonaviy innovatsion usullarni tatbiq etish, ilm-fan rivoji uchun xizmat qilayotgan professor-o‘qituvchilarni rag‘batlantirish hamda talabalar va professor – o‘qituvchilarga qo‘shimcha sharoitlar yaratish maqsadida Universitet klinikasi va o‘quv bazalaridagi o‘quv xonalarini ta'mirlash, jihozlash va moddiy – texnik bazasini mustahkamlash;

Universitet klinikasida yuqori texnologiyali tashxis qo‘yish va davolash usullarini joriy etish hamda Universitetga qo‘shimcha mablag‘lar tushirish maqsadida Universitet klinikasi bilan o‘zaro shartnomalar asosida hamkorlikda pullik asosda tibbiy xizmatlar ko‘rsatish bo‘linmalarini tashkil etish.

Quyidagilar:

a) Universitet faoliyatini moliyalashtirish manbalari etib belgilanadi:

O‘zbekiston Respublikasi Davlat budjeti mablag‘lari;

talabalarning to‘lov – kontrakt asosida ta'lim olishidan, shartnomalar asosida xizmatlar ko‘rsatishdan tushadigan mablag‘lar;

jismoniy va yuridik shaxslarning homiylik xayriyalari;

xalqaro moliya va xorijiy tashkilotlarning grantlari;

qonun hujjatlari bilan taqiqlanmagan boshqa manbalar;

b) Universitet klinikasi faoliyatini moliyalashtirish manbalari etib belgilanadi:

O‘zbekiston Respublikasining Davlat budjeti mablag‘lari;

amalga oshirilgan va ko‘rsatilgan tibbiy xizmatlardan tushadigan mablag‘lar;

jismoniy va yuridik shaxslarning homiylik xayriyalari;

xalqaro moliya va xorijiy tashkilotlarning grantlari;

qonun hujjatlari bilan taqiqlanmagan boshqa manbalar.

O‘zbekiston Respublikasining Davlat budjeti mablag‘lari Institut klinikasiga Sog‘liqni saqlash vazirligi tomonidan haqiqatda imtiyozli davolangan bemorlar bo‘yicha Institut klinikasi taqdim etgan choraklik hisobotlardan kelib chiqqan holda ajratiladi.

Sog‘liqni saqlash vazirligi tomonidan tasdiqlangan tashxis qo‘yish (diagnostika) va davolash standartlariga rioya qilgan holda imtiyozli toifaga kiruvchi bemorlarga order berish, ularni shifoxonaga joylashtirish va Davlat budjeti mablag‘lari hisobiga davolash qiymatini to‘lash, shuningdek, aholiga pullik asosda yuqori malakali ixtisoslashtirilgan tibbiy yordam ko‘rsatish;

shoshilinch tibbiy yordamga muhtoj bemorlarni shifoxonaga joylashtirish;

respublika ixtisoslashtirilgan tibbiyot markazlari daromadlarini shakllantirishning asosiy manbalari va ular faoliyatini moliyalashtirish bo‘yicha normativ – huquqiy hujjatlarda belgilangan qoidalar asosida tashkil etiladi.

Belgilab qo‘yilishicha, Universitet klinikalari quyidagi huquqlarga ega:

o‘ziga biriktirilgan davlat mulkidan samarali foydalanish va uni boshqarish bo‘yicha ishlarni tashkil etish hamda amalga oshirish;

Universitet bilan kelishilgan holda lavozimlar ro‘yxati va sonini ishlab chiqish va tasdiqlash;

xodimlar mehnatiga haq to‘lash va moddiy rag‘batlantirish shartlarini bajariladigan ishlarning murakkablik darajasi, sifati va hajmiga nisbatan tabaqalashtirilgan tarzda belgilash.