Adliya vazirligi maxsus komissiya qarorlari nega nashr etilmasligi bo‘yicha izoh berdi

Adliya vazirligi axborot xizmati rahbari Sevara O‘rinboyeva koronavirusga qarshi kurash shtabida bo‘lib o‘tgan navbatdagi brifingda kelib tushgan savollarga javob qaytardi. Xususan, maxsus komissiya qarorlarining matnlari hech qayerda nashr etilmasligi to‘g‘risidagi savolga javob berildi.

«Maxsus komissiya qarorlari bayonnoma ko‘rinishida rasmiylashtiriladi. Bundan oldingi savollarga javoblarda qayd etilgan asoslarga muvofiq, Komissiya barcha vakolatlarga ega. 

Yodda tutish lozimki, Maxsus komissiya yuz berayotgan hodisalarga nisbatan tezkor javob berish maqsadida tashkil etilgan. Zarur bo‘lganda epidemiologik vaziyat o‘zgarishi natijasida yuzaga kelayotgan kompleks masalalarni yechish va ularga javob berish, jumladan, muammolarni turli xususiyatga ega bo‘lgan maxsus mexanizmlarni ishga solish orqali hal etish bilan bog‘liq kechiktirib bo‘lmaydigan qarorlarni qabul qilishga to‘g‘ri keladi. Shu munosabat bilan Maxsus komissiya tomonidan qabul qilinayotgan qarorlar to‘liqsiz ko‘rinishda e'lon qilinyapti. 

Shu bilan birga, ushbu qarorlarning aholi va yuridik shaxslarga taalluqli qismlari Maxsus komissiyaning rasmiy bayonoti tarzida e'lon qilinmoqda. Mazkur axborot har kuni aholi bilan muloqot qilish mumkin bo‘lgan barcha aloqa kanallari orqali tarqatilmoqda. 

Markaziy telekanallar orqali to‘g‘ridan-to‘g‘ri jonli efirga uzatilayotgan va yirik ijtimoiy tarmoqlar sahifalarida translatsiya qilinayotgan kundalik brifinglar qabul qilinayotgan qarorlarni tushuntirishga qaratilgan. Har bir qaror ixtisoslashgan mutaxassislar tomonidan sodda tilda tushuntirib borilmoqda. Bundan tashqari, Komissiyaning barcha qarorlarini targ‘ib qilishga Maxsus komissiya va barcha davlat organlari ulkan sa'y-harakatlari safarbar qilishgan», deydi vazirlik vakili.

Brifingda ommaviy axborot vositalarida kasb vazifasini bajarayotgan shaxslarga nisbatan ayrim fuqarolar tomonidan kuch ishlatish holatlari haqida xabarlar tarqalayotgani, bunday holatda qonunchilikda qanday javobgarlik ko‘zda tutilgani haqidagi savolga ham javob berilgan.

O‘z xizmat yoki fuqarolik burchini bajarayotgan shaxslarga nisbatan noqonuniy harakatlarni sodir etish javobgarlikka sabab bo‘ladi.

Xususan, bunday shaxslarga nisbatan quyidagi harakatlarni  sodir etish, ya'ni: 
* qasddan odam o‘ldirish jinoyatini sodir etish – 15 yildan 25 yilgacha ozodlikdan mahrum qilish yoki umrbod ozodlikdan mahrum qilish bilan;
* qasddan badanga og‘ir shikast yetkazish – 5 yildan 8 yilgacha ozodlikdan mahrum qilish bilan;
* qasddan badanga o‘rtacha og‘ir shikast yetkazish – 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan;
* o‘ldirish yoki zo‘rlik ishlatish bilan qo‘rqitish – 300 soatdan 360 soatgacha majburiy jamoat ishlari yoki 2 yildan 3 yilgacha axloq tuzatish ishlari yoxud 1 yildan 3 yilgacha ozodlikni cheklash yoki 1 yildan 3 yilgacha ozodlikdan mahrum qilish bilan;
* haqorat qilish – BHMning 400 baravaridan (89 mln 200 ming so‘m) 600 baravarigacha (133 mln 800 ming so‘m) miqdorda jarima yoki 2 yildan 3 yilgacha axloq tuzatish ishlari yoxud 1 yilgacha ozodlikni cheklash yoki 1 yilgacha ozodlikdan mahrum qilish bilan jazolanadi.