«Xodimlarini ish bilan ta'minlab kelayotganlari ham davlatga yordam» –Ikramov pandemiya sharoitidagi tadbirkorlarning 4 toifasi haqida

Savdo-sanoat palatasi raisi Adham Ikramov xayriya tadbirlarida qatnashayotgan tadbirkorlar qatlamlari haqida so‘z yuritdi.

«Karantin vaziyatida biznes vakillarining ijtimoiy mas'uliyati ko‘rinyapti. Dastlab, tadbirkorlar o‘z mahallasidagi 100dan ortiq oilalarni o‘zi ta'minlab turishini aytgan tadbirkorlar tashabbus ko‘rsatdi. Bular – birinchi turdagi tadbirkorlar.

Ikkinchi qatlamdagi tadbirkorlar esa soliq, bank va moliya imtiyozlari asosida xayriya ko‘maklarini ko‘rsatayotgan tadbirkorlardir. Davlat tomonidan ham davlat binolarida ijarada o‘tiradigan 4 mingga yaqin tadbirkorlarning ijara pullari bekor qilindi.

Tadbirkorlarning uchinchi qatlami karantin davrida ham o‘z xodimlarini ish va maosh bilan ta'minlab kelayotganlardir. Ular qo‘shimcha xayriya qilishga imkon topmayotgan bo‘lsada, xodimlarini ish bilan ta'minlab kelayotganining o‘zi ham katta yordam hisoblanadi.

To‘rtinchi qatlamdagi tadbirkorlar esa yakka tartibda faoliyat yuritadigan kam sonli ishchilarga ega tadbirkorlar toifasidir. Ayni paytda ularning o‘ziga ham yordam zarur bo‘lmoqda», dedi Adham Ikromov xalqaro press klubda.

Savdo-sanoat palatasi raisining so‘zlariga ko‘ra, hech qaysi tadbirkor yordam ko‘rsatishga majburlanayotgani yo‘q, aksincha, yordam ko‘rsatish tashabbusi bilan chiqayotganlar ko‘pchilikni tashkil etadi.

«Tadbirkor va yordamga ehtiyojmand odamlar o‘rtasida hokimiyat, bank, soliq, moliya tashkilotlari turib bersa, tadbirkorlarning o‘zi mahallalaridagi yordamga muhtoj odamlarni aniqlab oladi va ularga ko‘mak ko‘rsatadi», deya qo‘shimcha qildi u.

Eslatib o‘tamiz, 20 aprel kuni o‘tkazilgan videoselektorda davlat rahbari tomonidan «Saxovat va ko‘mak» umumxalq harakatini yo‘lga qo‘yish tashabbusi ilgari surilib, uning doirasida tadbirkorlar imkoniyatidan kelib chiqib o‘z hududlaridagi yordamga muhtoj aholiga yordam ko‘rsatishi maqsadga muvofiqligini ta'kidlagan edi. Davlat tomonidan esa bunday tadbirkorlarga soliq, lizing, kredit to‘lovlari, zarur resurslar bilan ta'minlash bo‘yicha turli imtiyoz va preferensiyalar berilishi ham ma'lum qilingandi.