DSQ avtomobilda harakatlanish uchun stikerlar faqat soliqlar to‘langanidan keyin berilayotgani haqidagi ma'lumotni rad etdi

Ijtimoiy tarmoqlarda "ishlab chiqarishda ishtirok etayotgan avtoulovlarga stikerlar berish huquqini olgan DSQ bo‘linmalari xodimlari tadbirkorlarga soliqlarni yarim yil oldin to‘lash talab qilayotganligi to‘g‘risida" xabarlar tarqaldi.

“Avtotransport vositalarini boshqarish uchun ruxsatnomalar berishda soliq to‘lovchilar oldiga soliqlarni oldindan to‘lash kabi qo‘shimcha shartlar qo‘yilmaydi”, - deyiladi Davlat soliq qo‘mitasining ushbu xabarlar yuzasidan rasmiy munosabatida.

Arizalar Davlat soliq qo‘mitasiga kelib tushgan kundan e'tiboran bir ish kuni ichida ko‘rib chiqiladi. Yirik soliq to‘lovchi korxonalar xodimlariga transport vositalarini boshqarishga ruxsatnomalar manzil yo‘nalishi aniq ko‘rsatilgan taqdirda beriladi. Ushbu xizmat bepul.

Agar arizani ko‘rib chiqish natijasi ijobiy bo‘lsa, ruxsatnoma soliq to‘lovchining shaxsiy kabinetiga yuboriladi va lozim hollarda YHXB tomonidan haqiqiyligini aniqlash uchun DSQ bazasida saqlanadi. Stikerni yuklab olib, printer orqali chop etish mumkin.

“Agarda davlat soliq xizmati organlari tomonidan ruxsat beruvchi stikerni olish uchun soliqlarni oldindan to‘lash talab qilinganligi haqida aniq faktlar yoki korxonalar to‘g‘risida ma'lumotga ega bo‘lsangiz, (71) 244-98-27, (71) 244-98-34 raqamlari orqali DSQ matbuot xizmatiga murojaat qilishingizni so‘raymiz. Bunday faktlar tasdiqlangan taqdirda DSQ rahbariyati tomonidan davlat soliq xizmati organlari xodimlariga nisbatan darhol qat'iy choralar ko‘riladi”, - deyiladi ma'lumotda.

Shuningdek, DSQ matbuot xizmatining eslatishicha, o‘rta va kichik biznes toifasiga kiruvchi korxonalarning transport vositalariga ruxsat berish uchun mahalliy hokimiyat organlari javobgardir.

DSQ Respublika maxsus komissiyasi topshirig‘iga ko‘ra, Yirik soliq to‘lovchilar bo‘yicha hududlararo davlat soliq inspeksiyasi ro‘yxatiga kiradigan yirik soliq to‘lovchilarga ruxsat beruvchi stikerlar berishni boshladi. Bugungi kunda ularning soni 779 tani tashkil etmoqda. 

Soliq to‘lovchilarga qulaylik yaratish maqsadida yirik soliq to‘lovchilarning avtomobillariga ruxsat beruvchi stikerlar my.soliq.uz portalidagi shaxsiy kabinet orqali amalga oshiriladi. Buning uchun elektron ariza yuborish talab etiladi.