Veterinarlarga litsenziya DXM yoki YaIDXP orqali beriladi

Vazirlar Mahkamasining 23.05.2020 yildagi “Veterinariya faoliyatini litsenziyalash bo‘yicha davlat xizmatlarini ko‘rsatishning ma'muriy reglamentini tasdiqlash to‘g‘risida”gi 328-son qarori qabul qilindi.

Hujjat Prezidentning "Davlat xizmatlari ko‘rsatish milliy tizimini jadal rivojlantirish bo‘yicha qo‘shimcha chora-tadbirlar to‘g‘risida" 2020 yil 31 yanvardagi PF-5930-son Farmoniga muvofiq ishlab chiqilgan.

Norma’ning yozishicha, reglamentga muvofiq yuridik va jismoniy shaxslar litsenziyani faqat davlat xizmatlari markazlari yoki Yagona interaktiv davlat xizmatlari portali orqali olishlari mumkin.

Veterinariya va chorvachilikni rivojlantirish davlat qo‘mitasiga Axborot texnologiyalari va kommunikatsiyalarini rivojlantirish vazirligi bilan birgalikda:

2020 yil 1 sentyabrga qadar bo‘lgan muddatda Reglamentni joriy etishni ta'minlash;

"VIS-LICENSE" axborot tizimini uch oy muddatda ishlab chiqish va bugungi kunda faoliyat yuritayotgan lisenziatlar to‘g‘risidagi ma'lumotlarni 2020 yil 30 dekabrga qadar mazkur tizimga kiritish topshirildi.

Reglament quyidagi yo‘nalishlarga tatbiq etiladi:

veterinariya laboratoriya-diagnostika ishlari;

preparatlar, shu jumladan dorivor vositalar, ozuqa qo‘shimchalari va boshqalarni ishlab chiqarish va tayyorlash;

davolash-profilaktika ishlari.

Yuridik shaxs shtatida oliy yoki o‘rta maxsus ma'lumotga ega bo‘lgan mutaxassislarining mavjud bo‘lishi uning faoliyatini litsenziyalash uchun talablardan biri hisoblanadi. Ma'lumoti to‘g‘risidagi talab yakka tartibdagi tadbirkorga ham qo‘yiladi, yana u 5 yilda bir marta malakasini oshirishi kerak.

Ariza berish uchun zarur hujjatlar ro‘yxati nizomga ilovada keltirilgan.

Ariza ko‘rib chiqilganligi uchun yig‘im miqdori BHMning 1 baravarini, litsenziya berilganligi uchun davlat boji summasi esa BHMning 10 baravarini tashkil etadi.

Reglament 1.09.2020 yildan kuchga kiradi.