Access Health International ilmiy markazi prezidenti va boshqaruv kengashi raisi hamda Odam immuniteti tanqisligi virusi (OIV) va inson genomini tadqiq qilish orqali tanilgan dunyoning yetakchi virusologlaridan biri Uilyam Xazeltayn Bloomberg TV telekanaliga bergan intervyusida koronavirus borasidagi fikrlari bilan o‘rtoqlashdi.
Jamoaviy immunitet haqida
«Jamoaviy immunitet — bu xayolot. U mazkur virus bilan bog‘liq holatda mavjud emas. Bu Shvetsiyada ko‘plab o‘limlarga olib kelgan xavfli xayolot. Men bu so‘zni lug‘atimizdan, fikrlarimizdan butunlay chiqarib tashlagan bo‘lardim. Bu eng yaxshi holatda ham millionlab odamlarning o‘limi demakdir. Biz rostdan ham antibiotiklar ixtiro qilinishidan oldingi davrga qaytmoqchimizmi? Biz rostdan ham o‘rta asrlarga qaytmoqchimizmi?»
AQShda koronavirusning ikkinchi to‘lqini yuz berishi haqida
«Biz hali birinchi to‘lqindan o‘tganimiz yo‘q, shunday ekan, ikkinchi to‘lqin haqida gapirishga hali juda erta. Biz duch kelgan narsa – sunamiga o‘xshagan uzun to‘lqin. AQShda kasallanishlar soni bo‘yicha tekislikka chiqdik. Bu tekislikdan pastga tushish ancha vaqtni oladi. Hozir esa tepalikka ko‘tarilayotganga o‘xshayapmiz. Va ancha yuqoriga ko‘tarilmoqdamiz. Hozir kuniga 20 mingdan ortiq bemor qo‘shilyapti — bundan ikki oy avvalgi kabi. 1 aprelda 20 ming kishilik ko‘rsatkichdan o‘tgandik. Bu ancha avval bo‘lgandi, hozir esa iyunning o‘rtasi».
Karantindan erta chiqish haqida
«Biz ochilyapmiz va antibiotiklar endigina paydo bo‘lgan Ikkinchi jahon urushidan keyingi davrga qaytyapmiz. Penitsillinni kashf etdik. Ammo ungacha temir yo‘llarni, shaharlarni qurdik va ertangi kun hech qachon kelmaydigandek yashadik. Infeksiya o‘limga olib kelishini hamma bilardi. Biz o‘sha davrlarga qaytdik. Biz dunyoni vaksina va antibiotiklardan avval qurdik. Shunday davom etamiz, lekin buning badalini to‘laymiz».
Vaksina haqida
«Agar COVID-19ni davolashda nima eng samarali bo‘lishi borasida garov o‘ynashimga to‘g‘ri kelsa, vaksina 50 foizga, dorilar esa 90 foizga xavfsiz va samarali degan bo‘lardim.
