Ilon Mask badavlat insonlar ro‘yxatida Uorren Baffettdan o‘tib ketdi

Ushbu haftada Baffett 2,9 mlrd dollar mablag‘ini xayriyaga sarflagani sababli uning boyligi kamaydi. 89 yoshli Baffett 2006 yildan buyon 37 mlrd dollardan ortiq pulni xayriyaga sarflagan.

Foto: Getty Images

SpaceX kompaniyasi asoschisi va Tesla bosh direktori Ilon Mask Berkshire Hathaway direktorlar kengashi raisi Uorren Baffettdan ko‘ra badavlatroq kishiga aylandi, deb yozmoqda Bloomberg.

Bloomberg Billionaires Index reytingi ma'lumotlariga ko‘ra, Tesla aksiyalari narxi 11 foizga qimmatlashganidan so‘ng Maskning boyligi 6,1 mlrd dollarga ko‘paydi va 70,5 mlrd dollarga yetdi.

Mask birdaniga bir necha milliarderni quvib o‘tib, yettinchi pog‘onaga joylashdi. U Baffettdan tashqari, L'Oreal egasi Fransuaza Betankur-Mayyers, Oracle hammuassisi Larri Ellison, Reliance Industires egasi va Osiyoning eng boy kishisi Mukesh Ambani hamda Google hammuassisi Sergey Brinni ortda qoldirdi.

Ushbu haftada Baffett 2,9 mlrd dollar mablag‘ini xayriyaga sarflagani sababli uning boyligi kamaydi. 89 yoshli Baffett 2006 yildan buyon 37 mlrd dollardan ortiq pulni xayriyaga sarflagan.

Ilon Mask o‘tgan haftada Los-Anjyelesdagi to‘rtta uyini sotishga qaror qildi. U avvalroq shaxsiy uyga ega bo‘lmaslikka ahd qilganini aytgandi.

#Ilon Mask #Uorren Baffett