Turkmanistonda 6 iyuldan buyon ish olib borayotgan Jahon sog‘liqni saqlash tashkilotining maxsus missiyasi o‘n kun davom etgan tekshiruvlarning xulosasini e'lon qildi. Missiya rahbari Ketrin Smolvud maxsus brifingda «Turkmaniston JSSTning Yevroosiyo mintaqasida birorta ham COVID-19 kasalligi aniqlanmagan yagona a'zosi bo‘lib turibdi» deb bayonot berdi.
Biroq, Turkmanistonda odamlar shubhali pnevmoniyadan o‘lishda davom etmoqda. Ashxobodda 13 iyul kuni Turkmaniston davlat televideniyesi xodimi Choriguli Avlikuliyev to‘satdan vafot etdi. Marhumning kasallik varaqasi bilan tanish bo‘lgan tibbiyot xodimining so‘zlariga ko‘ra, rentgen suratlarda Avlikuliyevning o‘pkasi deyarli ko‘rinmagan. Choriguli Avlikuliyev oxirgi ishga borgan kuni kasalxonaga borishdan bosh tortib, shunchaki ozgina qon bosimi ko‘tarilganidan shikoyat qilgan.
Avlikuliyev kasalxonaga 12 iyul kuni, o‘limidan bir kun oldin yotqizilgan. 13 iyul kuni u vafot etgan, 14 iyul kuni dafn qilingan.
Avlakuliyevning jasadi qarindoshlariga berilmagan va darhol qabristonga olib borib dafn etilgan. Choriguli Avlikuliyev atigi 45 yoshda edi. U 20 yildan ortiq vaqt davomida turkman televideniyesida ishlagan. Hozirgi paytda Choriguli Avlikuliyevning egizak akasi, Saparmurod Niyozov nomli kasalxonaning umumiy amaliyot shifokori bo‘lgan Ishanguli Avlikuliyev ham kasalxonaning jonlantirish bo‘limida qolmoqda.
Ketrin Smolvud o‘z nutqida JSST mutaxassislari Turkmanistondagi turli tibbiyot muassasalariga tashrif buyurgani hamda ko‘plab tibbiyot xodimlari bilan uchrashganini ta'kidladi. U JSST vakillari aynan qaysi kasalxonalarga tashrif buyurganini ochiqlamagan, ammo Turkmanistondagi kuzatuvchilarning fikriga ko‘ra, mamlakat kasalxonalaridagi haqiqiy holat JSST vakillaridan yashirilgan. Ularning bildirishicha, viloyatlardagi shifoxonalar koronavirus alomatlari bo‘lgan bemorlar bilan to‘la.
«Bolqonobodda koronavirus yuqtirganlikda gumon qilingan odamlar sil kasalligi davolanadigan mahalliy dispanserga yotqizilgan. Ushbu dispanser hammani yotqizish imkoniyatiga ega emas. Shuning uchun endi bemorlarni teri kasalliklari dispanseriga yotqizishayapti», deb ma'lumot bergan manbalardan biri.
Uning so‘zlariga ko‘ra, tez tibbiy yordam shifokorlari aholidan mamlakatda koronavirus mavjudligini yashirmayapti va odamlarga hojati bo‘lmaganda uydan chiqmaslikni tavsiya qilmoqda.
