«O‘zbekoziqovqatxolding» tugatiladi

Prezidentning «Respublika oziq-ovqat sanoatini boshqarish tizimini takomillashtirishga oid qo‘shimcha chora-tadbirlar to‘g‘risida»gi qarori loyihasi muhokama uchun joylashtirildi.

O‘zbekiston Respublikasi Qishloq xo‘jaligi vazirligi tuzilmasida boshqaruv xodimlarining cheklangan soni 31 birlikdan iborat Oziq-ovqat sanoatini rivojlantirish departamenti tashkil etiladi.

O‘zbekiston Respublikasi Qishloq xo‘jaligi vazirligi markaziy apparatining tuzilmasida O‘zbekiston Respublikasi Qishloq xo‘jaligi vazirining o‘rinbosari – Oziq-ovqat sanoatini rivojlantirish departamenti rahbari lavozimi joriy qilinadi.

Qishloq xo‘jaligi vazirining o‘rinbosari – Oziq-ovqat sanoatini rivojlantirish departamenti rahbari quyidagilar uchun mas'ul etib belgilanadi:

oziq-ovqat mahsulotlarini qayta ishlash va sohada qo‘shilgan qiymat zanjirini yaratish;

oziq-ovqat sanoati korxonalarini qiynayotgan muammolarni doimiy tahlil qilib borish va ularni hal qilish bo‘yicha tizimli ishlarni tashkil etish;

Tashqi ishlar vazirligi hamda Investitsiyalar va tashqi savdo vazirligi bilan birgalikda oziq-ovqat mahsulotlarini ishlab chiqarish uchun zarur bo‘lgan xomashyo materiallarini import qilishdagi to‘siqlarni bartaraf etish bo‘yicha Hukumatlararo komissiyaga takliflar tayyorlash.

O‘zbekiston Respublikasi O‘zbekiston Respublikasi Iqtisodiy taraqqiyot va kambag‘allikni qisqartirish vazirligi, Moliya vazirligi, Davlat aktivlarini boshqarish agentligi va “O‘zbekoziqovqatxolding” aksiyadorlik jamiyatining:

“O‘zbekoziqovqatxolding” aksiyadorlik jamiyatini tugatish;

“O‘zbekoziqovqatxolding” aksiyadorlik jamiyati Oziq-ovqat sanoati korxonalarini rivojlantirish, rekonstruksiya qilish va modernizatsiyalash jamg‘armasining tugatish yakunlariga ko‘ra qoldiq mablag‘larini Jamg‘armaga o‘tkazish to‘g‘risidagi takliflariga rozilik beriladi.

O‘zbekiston Respublikasi Moliya vazirligi zamonaviy savdo-logistika markazlari, meva-sabzavot mahsulotlarini saqlash va qayta ishlash bo‘yicha muzlatish quvvatlarini tashkil etish uchun Hukumatning kafolati bilan jalb etilgan xalqaro moliya institutlari va xorijiy banklar oldidagi tugatilayotgan “O‘zbekoziqovqatxolding” xolding kompaniyasining qarz mablag‘larini grafik bo‘yicha to‘lab borilishini ta'minlaydi.

“O‘zbekoziqovqatxolding” aksiyadorlik jamiyati tarkibiga kiruvchi korxona va tashkilotlarning ustav jamg‘armalaridagi davlat aksiya (ulush)lari balans qiymati bo‘yicha bepul O‘zbekiston Respublikasi Davlat aktivlarini boshqarish agentligiga o‘tkaziladi.

Bunda, “O‘zagroeksportbank” ATB va “Agrobank” ATB ustav kapitallaridagi “O‘zbekoziqovqatxolding” aksiyadorlik jamiyati ulushi O‘zbekiston Respublikasi Moliya vazirligiga o‘tkaziladi.

Iqtisodiy taraqqiyot va kambag‘allikni qisqartirish vazirligi, Oliy va o‘rta maxsus ta'lim vazirligi Qishloq xo‘jaligi vazirligi va boshqa manfaatdor vazirlik va idoralarning kadrlarga bo‘lgan ehtiyojlari asosida 2021/2022 o‘quv yilidan boshlab respublika oliy ta'lim muassasalarining “5321000-Oziq-ovqat texnologiyasi (mahsulot turlari bo‘yicha)” hamda “5410500-Qishloq xo‘jalik mahsulotlarini saqlash va dastlabki ishlash texnologiyasi (mahsulotlar turlari bo‘yicha)” ta'lim yo‘nalishlari bo‘yicha bakalavriatning kunduzgi va sirtqi ta'lim shakllariga o‘qishga qabul qilishning davlat buyurtmasi parametrlarini bosqichma-bosqich oshirib borish choralarini ko‘radi.

O‘zbekiston Respublikasi Qishloq xo‘jaligi vazirligi:

tegishli ta'lim yo‘nalishlari (mutaxassisliklar)da soha bo‘yicha tahsil olayotgan talabalarning amaliyotlarini o‘tash obektlari – ish beruvchi tashkilotlar to‘g‘risidagi ma'lumotlar bazasini shakllantiradi;

Oliy va o‘rta maxsus ta'lim vazirligi bilan birgalikda 2020 yilning dekabr oyiga qadar oziq-ovqat texnologiyalari sohasida zamonaviy texnika va texnologiyalarni joriy etgan yetakchi korxona, tashkilotlar va muassasalar bilan talabalarning amaliyotlarini o‘tash yuzasidan o‘zaro hamkorlik o‘rnatish to‘g‘risida tegishli chora-tadbirlarni amalga oshiradi.