«Qo‘qon» erkin savdo zonasi tashkil etiladi

Prezidentning “Qo‘qon” erkin iqtisodiy zonasi faoliyatini yanada takomillashtirish va “Qo‘qon” erkin savdo zonasini tashkil etish chora-tadbirlari to‘g‘risida”gi farmoni loyihasi muhokama uchun joylashtirildi.

O‘zbekiston Respublikasi Investitsiyalar va tashqi savdo vazirligi, Iqtisodiy taraqqiyot va kambag‘allikni qisqartirish vazirligi, Davlat bojxona qo‘mitasi, Davlat aktivlarini boshqarish agentligi va Farg‘ona viloyati hokimligining:

“Qo‘qon” erkin iqtisodiy zonasini “Qo‘qon” maxsus sanoat zonasiga aylantirish;

“Qo‘qon” erkin iqtisodiy zonasi direksiyasi” davlat unitar korxonasining tashkiliy-huquqiy shaklini “Qo‘qon” maxsus sanoat zonasi” mas'uliyati cheklangan jamiyatiga o‘zgartirish;

O‘zbekiston Respublikasining Tojikiston Respublikasi bilan chegaradosh Farg‘ona viloyatining Beshariq tumanidagi yer maydonda “Qo‘qon” erkin savdo zonasini tashkil etish takliflariga rozilik beriladi.

Bunda, “Qo‘qon” MSZ va “Qo‘qon” ESZ faoliyatlarini operativ boshqaruv funksiyasi “Qo‘qon” maxsus sanoat zonasi” MChJ Boshqaruvchi kompaniyasiga yuklatiladi.

Belgilanishicha:

“Qo‘qon MSZ” MChJning dastlabki ustav kapitali qayta tashkil etilayotgan “Qo‘qon” maxsus sanoat zonasi direksiyasi” DUKning mulklari hisobiga shakllantiriladi;

“Qo‘qon” MSZ” MChJ “Qo‘qon” maxsus sanoat zonasi direksiyasi” DUKning huquqlari va majburiyatlari bo‘yicha vorisi hisoblanadi;

“Qo‘qon” MSZ” MChJning ustav kapitalida davlat nomidan ta'sischisi O‘zbekiston Respublikasi Davlat aktivlarini boshqarish agentligi hisoblanadi;

“Qo‘qon” maxsus sanoat zonasi ishtirokchilari uchun barcha, shu jumladan litsenziyalash va ruxsatnomalar olish bo‘yicha davlat xizmatlari “Qo‘qon MSZ” MChJ va (yoki) O‘zbekiston Respublikasi Adliya vazirligi huzuridagi Davlat xizmatlari agentligi tomonidan “yagona darcha” tamoyili asosida taqdim etiladi.

O‘zbekiston Respublikasi Davlat aktivlarini boshqarish agentligi belgilangan tartibda “Qo‘qon MSZ” MChJning tuzilmasi tasdiqlanishi va ta'sis hujjatlari shakllantirilishini ta'minlaydi.

Bunda, “Qo‘qon” MSZ” MChJ ustavida quyidagi qo‘shimcha vazifa va funksiyalar yuklanishi tavsiya qilinadi:

marketing, huquqiy va moliyaviy konsalting, logistika va transport, mehmonxona, ta'lim va kadrlar bilan bog‘liq xizmatlarni ko‘rsatish;

“yagona darcha” prinsipi bo‘yicha litsenziya va ruxsat etish xususiyatiga ega hujjatlarni, shu jumladan, maxsus sanoat zonasining bosh rejasiga muvofiq binolar va inshootlarni loyihalashtirish, qurish, ishga tushirish, ulardan foydalanish uchun berishni tashkillashtirish;

obektlarni qurishda xalqaro standartlar va talablarni qo‘llanilishini ta'minlash;

investitsiya loyihalarini joylashtirish va maxsus sanoat zonasi ishtirokchilariga yer uchastkalarini berish, shu jumladan, ijara huquqlari asosida berish masalalari yuzasidan mustaqil ravishda qarorlar qabul qilish.

“Qo‘qon” ESZning asosiy faoliyat yo‘nalishlari va vazifalari etib quyidagilar belgilanadi:

• tovarlar savdosi uchun qulay shart-sharoitlar yaratish, shu jumladan, konsignatsiya omborlarini, tovarlarga ishlov berish, ularni o‘rab-joylash, saralash, saqlash uchun maydonchalarni tashkil etish;
• xalqaro va mintaqaviy ulgurji hamda chakana zamonaviy savdo formatlarini rivojlantirish;
• chegara hududlarida logistika xizmatlarining to‘liq spektrini rivojlantirish;
• ko‘rgazmalar faoliyatini rivojlantirish orqali tadbirkorlik sub'yektlari orasida kooperatsiyani yaxshilash;
• chegara hududlarida aholi farovonligini oshirish va ish o‘rinlarini yaratish;
• terminal va transport faoliyatlarini, tibbiy va moliyaviy xizmatlarni, ko‘ngilochar, mehmonxona va restoran biznesini, tijorat xizmatlar infratuzilmasini tashkil etish.

Belgilanishicha:

“Qo‘qon” ESZning faoliyat yuritish muddati “Qo‘qon” MSZ faoliyat yuritish muddatida tashkil etiladi va ushbu muddat keyinchalik uzaytirilishi mumkin;

“Qo‘qon” ESZ hududida alohida soliq va bojxona tartiblari amal qiladi;

“Qo‘qon” erkin savdo zonasi hududida yaratiladigan barcha bino-inshootlar, savdo va logistika obektlari “Qo‘qon” MSZ” MChJ va tadbirkorlik sub'yektlari mablag‘lari hisobiga amalga oshiriladi;

“Qo‘qon” ESZ hududidagi yer uchastkalari “Qo‘qon” MSZ” MChJning tasarrufida turadi va “Qo‘qon” ESZ ishtirokchilarining foydalanishiga investitsiya bitimiga muvofiq investitsiya loyihalarini amalga oshirish uchun “Qo‘qon” MSZ” MChJ qarorlari asosida beriladi;

Qo‘qon” ESZ hududida erkin bojxona zonasi bojxona rejimi joriy etiladi va bunda “Qo‘qon” ESZga olib kirilgan tovarlar O‘zbekiston Respublikasining bojxona hududidan tashqarida joylashgan deb qaraladi;

“Qo‘qon” ESZ hududida tovarlar (ishlar va xizmatlar) savdosi uchun to‘lovlar va pul o‘tkazmalari joriy operatsiyalar uchun erkin konvertatsiya tamoyiliga asosan tovarlar (ishlar va xizmatlar) uchun, davlat bojlari, yig‘inlar va boshqa shartli to‘lovlardan tashqari, xorijiy valutada to‘lovlarni amalga oshirishga ruxsat etilgan holda amalga oshiriladi;

“Qo‘qon” ESZ hududida O‘zbekiston Respublikasi fuqarolari, shuningdek, respublika hududida joylashgan chet el fuqarolari va fuqaroligi bo‘lmagan shaxslar tegishli tasdiqlovchi hujjatlar asosida kirib-chiqadi;

“Qo‘qon” ESZ hududiga chet el fuqarolari va fuqaroligi bo‘lmagan shaxslarning kirib-chiqish tartibi, xorijga chiqish huquqini beruvchi milliy pasporti yoki fuqaroligi bo‘lmagan shaxsning harakatlanish hujjatlari asosida amalga oshiriladi. Bunda, ularning erkin savdo zonasi hududida viza rasmiylashtiruvisiz bo‘lish muddati besh kun etib belgilanadi;

“Qo‘qon” ESZ hududiga voyaga yetmaganlarning kirib-chiqishi shaxsini tasdiqlovchi tegishli hujjatlar asosida ota-onalari yoki ulardan biri hamrohligida amalga oshiriladi.