Iste'molchilar elektr qurilmalarini texnik ekspluatatsiya qilish qoidalari hamda Iste'molchilar elektr qurilmalarini ekspluatatsiya qilishda xavfsizlik texnikasi qoidalari tasdiqlanadi.
Vazirlar Mahkamasining “Iste'molchilar elektr qurilmalarini texnik ekspluatatsiya qilish qoidalari hamda Iste'molchilar elektr qurilmalarini ekspluatatsiya qilishda xavfsizlik texnikasi qoidalarini tasdiqlash to‘g‘risida”gi qarori loyihasi e'lon qilindi.
Qoidalar O‘zbekiston Respublikasining “Elektr energetikasi to‘g‘risida” qonuniga muvofiq elektr energiyasi iste'molchilari elektr qurilmalarini ishonchli, xavfsiz va samarali ekspluatatsiya qilishni ta'minlash, shuningdek ularni ishga yaroqli holatda saqlab turish maqsadida ishlab chiqilgan bo‘lib, iste'molchilar elektr qurilmalarini ekspluatatsiya qilish, sozlash va ta'mirlash bilan shug‘ullanuvchi muhandis-texnik xodimlar (MTX) uchun mo‘ljallangan.
“Iste'molchilar elektr qurilmalarini texnik ekspluatatsiya qilish qoidalari” (TEQQ) idoraviy mansubligidan va mulkchilik shaklidan qat'iy nazar barcha iste'molchilar uchun majburiydir.
Iste'molchilarning yangidan montaj, rekonstruksiya va modernizatsiya qilingan elektr qurilmalari amaldagi Elektr qurilmalarni tuzilishi qoidalariga (EQTQ) muvofiq bajarilgan bo‘lishi, shuningdek muvofiqlik sertifikatiga ega bo‘lishi shart.
Sertifikatlanmagan elektr uskunalardan foydalanish va ularni ekspluatatsiya qilish man etiladi.
Qoidalar iste'molchilarning ishlab turgan, kuchlanishi 220 kV.gacha bo‘lgan elektr qurilmalarga tatbiq etiladi. Qoidalarda “kuchlanishi 220 kV.gacha bo‘lgan elektr qurilmalar” yoki “kuchlanishi 1000 V.gacha bo‘lgan elektr qurilmalar” deyilganda kuchlanishi tegishlicha 220 kV va 1000 V bo‘lgan elektr qurilmalarni ham tushunish lozim.
Ishlab turgan elektr qurilmalar deb, to‘liq yoki qisman kuchlanish ostida bo‘lgan yoki istalgan vaqtda kommutatsion apparatura ulanishi bilan yoki elektromagnit induksiya hisobiga kuchlanish berilishi mumkin bo‘lgan qurilmalar yoki ularning uchastkalari tushuniladi.
Elektr xavfsizligi shartlari bo‘yicha elektr qurilmalar kuchlanishi 1000 V.gacha bo‘lgan elektr qurilmalarga va kuchlanishi 1000 V.dan yuqori bo‘lgan elektr qurilmalarga bo‘linadilar.
Qoidalarda ko‘zda tutilmagan, alohida ishlab chiqarish shartlariga yoki maxsus elektr qurilmalarga ega bo‘lgan iste'molchilarning elektr qurilmalarini texnik ekspluatatsiya qilish, sohada ishlab chiqilgan va belgilangan tartibda tasdiqlangan qoidalar bo‘yicha amalga oshirilishi mumkin.
