Avariya holatidagi ko‘p qavatli uylar o‘rnida yangi uy-joylar quriladi (ro‘yxat)

Vazirlar Mahkamasining “Respublika hududlarida eskirib qolgan uy-joy fondini ta'mirlash va yangilash chora-tadbirlarini amalga oshirish to‘g‘risida”gi qarori loyihasi e'lon qilindi.

O‘zbekiston Respublikasi Uy-joy kommunal xizmat ko‘rsatish vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan avariya holatidagi ko‘p kvartirali uy-joy fondi xatlovdan o‘tkazilgan.

Ko‘p kvartirali uy-joy fondini ta'mirlash va yangilashga qaratilgan quyidagilar:

2021-2022 yillarda eskirgan ko‘p kvartirali uylarni ta'mirlash bo‘yicha renovatsiya dasturi;

2021-2023 yillarda avariya holatidagi ko‘p qavatli uylar o‘rnida bosqichma-bosqich yangi uy-joylar qurish bo‘yicha renovatsiya dasturi tasdiqlanadi.

O‘zbekiston Respublikasi Uy-joy kommunal xizmat ko‘rsatish vazirligi huzuridagi “Ko‘p xonadonli uylar, issiqlik ta'minoti obektlarini qurish bo‘yicha injiniring kompaniyasi” davlat unitar korxonasi Dasturlar doirasida bosh loyihachi va bosh pudratchi tashkilotlarini qonun hujjatlarida belgilangan tartibda tender (tanlov) savdolari orqali aniqlanadi.

Dasturlarni amalga oshirish doirasida Qoraqalpog‘iston Respublikasi respublika budjeti, viloyatlar va Toshkent shahar mahalliy budjet mablag‘lari, xalqaro moliya institutlari va boshqa xorijiy donorlarning grantlari, shuningdek, qonun hujjatlari bilan taqiqlanmagan boshqa mablag‘lar moliyalashtirish manbalari etib belgilanadi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari yer uchastkasini davlat va jamoat ehtiyojlari uchun olib qo‘yilishida taqdimot materiallarini Davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha markazlashtirilgan jamg‘arma kuzatuv kengashi bilan kelishilishini ta'minlaydi.

O‘zbekiston Respublikasi Qurilish vazirligi aholi punktlarining bosh rejalariga asosan yangi qurilayotgan ko‘p kvartirali uy-joylarni joylashtirilishiga qat'iy amal qilinishi va qurilish-montaj ishlarini amalga oshirilishida davlat nazoratini olib borilishini ta'minlaydi.

O‘zbekiston Respublikasi Uy-joy kommunal xizmat ko‘rsatish vazirligi Vazirlar Mahkamasi bilan kelishilgan holda, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining asoslantirilgan takliflariga muvofiq Dastur parametrlariga, zaruratga ko‘ra, o‘zgartirishlar kiritish huquqi beriladi.