E'lon qilingan natijalar yana bir marta ko‘rib chiqiladi – DTM abituriyentlarning natijalaridagi tushunmovchiliklar bo‘yicha izoh berdi

DTM rasmiysining qayd etishicha, o‘tgan yili kirish imtihonlarida bir kunda 60 mingga yaqin abituriyent ishtirok etgan edi. Joriy yil esa bu raqam ikki barobar ortdi va kuniga 120 ming atrofida abituriyent test topshirdi. Bu esa ish hajmi ham 2 barobar oshganini ko‘rsatadi.

Shuningdek, bu yilgi testlarning ochiq havoda o‘tkazilishi ham jarayonga ta'sir qildi. Chunki O‘zbekiston iqlimida chang bor. Javoblar varaqasi chang bo‘lsa, uni tekshirayotganda skaner texnikalari o‘qimasligi mumkin. Shuning uchun texnikalarni ham doimiy ravishda tozalab turishga to‘g‘ri kelgan.

«Hozirga qadar e'lon qilingan natijalar hali oxirgi natija emas. Mandatgacha bo‘lgan davrda yopiq rejimda ishlayotgan mutaxassislar tomonidan natijalar yana bir marta ko‘rib chiqiladi. Tashkilotdan xatolik o‘tmasligi uchun hamma javoblar tahlil qilib chiqiladi va Davlat qabul komissiyasiga kiritiladi. Davlat qabul komissiyasi tomonidan mandat e'lon qilingandan so‘ng abituriyent o‘z natijasidan norozi bo‘lsa, apellyatsiya shikoyatini yozishi kerak bo‘ladi.

Hozir ko‘pchilik natijalaridan norozi bo‘lyapti, lekin bu hali faqat dastlabki natijalar. Ular yana qayta ko‘rib chiqiladi», deya Sardor Rajabovning so‘zlarini keltirmoqda Kun.uz muxbiri.

Bundan tashqari, Davlat test markazi boshqarma boshlig‘i Barno Rajabovning qo‘shimcha qilishicha, imtihonlarni ochiq havoda o‘tkazish ob-havo o‘zgarishlari kuzatilishi va imtihon jarayonini nazorat qilishdagi qiyinchiliklar tufayli biroz murakkabliklar tug‘dirgan. Shuning uchun keyingi yilgi imtihonlarda ochiq havoda imtihon o‘tkazish tajribasidan foydalanilmaydi.