Farmon bilan quyidagi hujjatlar tasdiqlandi:
- Transformatsiya qilinadigan yirik davlat korxonalari va xo‘jalik birlashmalari ro‘yxati;
- Korporativ boshqaruv va moliyaviy audit joriy etiladigan, operatsion samaradorligi oshiriladigan davlat ishtirokidagi korxonalar ro‘yxati;
- Xususiylashtirishdan oldin tayyorlash va investitsiyaviy jozibadorligini oshirishning manzilli dasturlari orqali ommaviy savdolarga chiqariladigan davlat aktivlari ro‘yxati;
- Davlat aksiya paketlari (ulushlari) to‘lig‘icha ommaviy savdolar orqali xususiy sektorga sotiladigan korxonalar ro‘yxati;
- Xususiy sektorga sotiladigan davlat ko‘chmas mulki obektlari ro‘yxati.
Moliya vazirligida Davlat ishtirokidagi yirik korxonalarni transformatsiya qilish departamenti tashkil etilmoqda.
2020 yil 1 dekabrga qadar raqobat muhitiga ta'sir qiladigan imtiyoz va preferensiyalar xatlovdan o‘tkazilib, ularni bekor qilish bo‘yicha qaror loyihasi Prezidenti Administratsiyasiga kiritish belgilandi.
Xuddi shu muddatgacha, transformatsiya qilinadigan va korporativ/moliyaviy audit joriy etiladigan korxonalar faoliyat yuritadigan sohalarda bozor munosabatlari tamoyillariga to‘liq o‘tish, raqobat muhitini shakllantirish va xususiy sektorni jalb qilish choralari ishlab chiqiladi.
2021 yil 1 iyulga qadar bu toifadagi korxonalarning barcha investitsiya loyihalari xatlovdan o‘tkazilib, boshlanmagan hamda moliyaviy manbalari aniq bo‘lmagan loyihalar to‘xtatiladi.
2021 yil 1 yanvarga qadar «O‘zagroservis» va «O‘zagrokimyohimoya» aksiyadorlik jamiyatlari faoliyati tanqidiy ko‘rib chiqilib, ularning faoliyatini bozor tamoyillari asosida yo‘lga qo‘yish va sohada xususiy sektorni rivojlantirish bo‘yicha takliflar ishlab chiqiladi.
