Kun.uz’ning AQShdagi muxbiri Sietlda bosh konsul Ahror Burhonov bilan suhbatlashdi. Diplomatga koʻra, Amerikada Oʻzbekistonga ishonishyapti, Tinch okeani mintaqasida vakolatxona ochishdan asosiy maqsad ham davlatni tanitish va fuqarolarni himoyaga olish. Xoʻsh, nega aynan Sietl tanlandi va konsul hukumatdan qaysi topshiriqlar bilan kelgan?
Sietlda oʻtgan hafta bosh konsullik rasman ochildi. Unda Oʻzbekistonning AQShdagi elchisi, BMTdagi doimiy vakili, Nyu Yorkdagi bosh konsul va Vashington shtati rasmiylari qatnashdi. Hammani qiziqtirayotgan asosiy savol shuki, nega AQShning hududi oxirgi nuqtasi vakolatxona ochish uchun tanlandi?
Kun.uz’ning AQShdagi muxbiri Sietldagi bosh konsul bilan suhbatlashdi. Ahror Burhonovga koʻra, shahar katta iqtisodiy makon. Microsoft, Amazon, Google va qator kompaniyalarning ofislari joylashgan. IT, mashinasozlik, aviatsiya, tibbiyot va ishlab chiqarish boʻyicha shtat ijobiy natijalarga ega. Bundan tashqari, AQShning bu tomonida Oʻzbekistonni hech kim bilmaydi, targʻibot muhim.
“Kelganimizda oʻzi Sietl vakolatxona ochishimizga tayyormi degan savolni koʻtardik. Rostini aytsam, soʻrovnomada qatnashgan har oʻnta odamdan toʻqqiztasi Oʻzbekistonni tanimadi. Amerikaning bu tomonida biz davlatni tanitishimiz kerak deb oʻyladik”, deydi bosh konsul.
Diplomatning qoʻshimcha qilishicha, u avvalo Oʻzbekiston fuqarolarini himoya qilish va yordam koʻrsatish topshirigʻi bilan kelgan. Bundan tashqari, sunʼiy intellekt, robototexnika, ishlab chiqarishdagi katta kompaniyalar bilan muloqot yoʻlga qoʻyilgan. Yaqinda Vashington shtati savdo delegatsiya safarini tashkillash borasida jarayon davom etmoqda. Oʻzbekiston mahsulotlarini eksport qilish boʻyicha AQSH kompaniyalari bilan muzokaralar boʻlib oʻtyapti.
Xoʻsh, konsullik kimlarga xizmat koʻrsatadi? Bosh konsulga koʻra, Sietldagi vakolatxona toʻrtta shtat – Vashington, Montana, Aydaho va Oregonga javobgar.
Ahror Burhonov vakolatxona binosining ijaraga olinishi haqida ham gapirarkan, 39-qavatdagi joy diplomatiya ishga solingani sabab uch baravar arzonga tushganini aytadi.
“Shaharning 30%ini qurgan odamga tegishli bu bino ham. Aynan uni topdik va Oʻzbekistonni tanitishga harakat qildik. Birodar shahar ekanini eslatdik, shunda ijara haqqi uch baravarga arzonladi”, deydi u.
Suhbatni Kun.uz’ning YouTube’dagi sahifasida toʻliq tomosha qiling.
