16:33 / 20.11.2020
2547
Британия 2030 йилдан бензин ва дизелда юрувчи машиналар савдосини тақиқлайди

Британия бош вазири маъмурияти расмий сайтида ёзилишича, ҳукуматнинг 10 бандли «Яшил саноат инқилоби» режаси доирасида 2030 йилдан бошлаб бензин ва дизел ёқилғисида ҳаракатланувчи транспорт воситалари савдоси тақиқланади.

Фото: KUN.UZ

Баёнотда 2030 йилгача шамол энергиясидан олинадиган энергияни 4 баравар кўпайтириш режалаштирилгани ва фақатгина шу соҳада 60 минг янги иш ўрни яратилиши таъкидланган.

Хабарга кўра, водороддан олинадиган энергия қуввати 2030 йилга келиб 5 гигаваттга етиши кутилмоқда. Шунингдек, атом энергиясининг тоза энергия манбаи сифатида қўллаб-қувватланиши айтилган. Британия катта атом электр станцияларидан ташқари, ривожланган кичик АЭСларни қуриш орқали бу соҳада жами 10 минг кишини иш билан таъминламоқчи.

Қиролликнинг «яшиллаштириш лойиҳасига» кўра, электрда ҳаракатланувчи транспорт воситаларини сотиб олиш учун имтиёзлар берилади, уларни қувватловчи шохобчалар сони кўпайтирилади. Мамлакатда жамоат транспортида, велосипедда ва пиёда юриш рағбатлантирилади. Кейинги босқичда эса углерод чиқармайдиган самолётлар ва кемалар ишлаб чиқариш бўйича тадқиқот ишлари қўллаб-қувватланади.

Режа доирасида уйлар, мактаблар ва шифохоналар энергия тежамкор қилиб қурилади, углерод чиқиндиларини йўқ қилиш бўйича технологик ҳаракатлар жадаллаштирилади. Ҳар йили 30 минг гектар ерни ўрмонлаштириш ва Лондоннинг молиявий маркази Лондон Ситини яшил молия марказига айлантириш ишлари бошланади.

Top