Maktablarda ma'naviy-tarbiyaviy ishlar yangicha asosda tashkil etilib, «Milliy g‘oya», «Odobnoma», «Dinlar tarixi», «Vatan tuyg‘usi» kabi fanlar asosida yagona «Tarbiya» fani joriy qilindi.
Deputatlar «Tarbiya» fanini o‘qitish bo‘yicha olib borilayotgan tashkiliy ishlar bilan qiziqdilar.
«Tarbiya» fani yoshlarni fikrlashga o‘rgatadigan, ularni milliy qadriyatlarimizga sodiq, vatanparvar etib tarbiyalashga xizmat qilishi kerak», — dedi Qonunchilik palatasi spikeri N.Ismoilov.
«Tarbiya» fanining o‘quv dasturi va darsliklarida vatanparvarlik, tadbirkorlik, irodalilik, mafkuraviy immunitet, mehr-oqibatlilik, mas'uliyatlilik, bag‘rikenglik, huquqiy madaniyat, innovatsion fikrlash, mehnatsevarlik kabi ko‘nikmalarni shakllantirishga alohida urg‘u berilgan.
Xususan, bunda milliy an'analar, ulug‘ allomalarning hayot yo‘llari, asarlari, zamondosh qahramonlarning faoliyati ibrat sifatida keng foydalanilgan. Mavzularni o‘qitishda bugun jahon miqyosida ommalashgan «Loyiha asosida o‘qitish», «Qiziqishlar asosida ta'lim berish», «Art-fest», «Namuna ko‘rsatish», «Misollar orqali o‘qitish», «Vaziyatlarni tahlil qilish» kabi ta'lim berishning ilg‘or texnologiya va uslublari qo‘llanilgan.
«Hukumat soati»da ushbu yo‘nalishda olib borilayotgan islohotlarni yanada rivojlantirish yuzasidan aniq tavsiyalar berildi. Muhokamalar yakunida mazkur yo‘nalishdagi ishlar yuzasidan samarali parlament nazoratini ta'minlashga kelishib olindi», deyiladi Qonunchilik palatasi xabarida.
