Qashqadaryoda eski transformator va tarmoqlar yangilanmoqda

Qashqadaryo viloyatida 171 ta nimstansiya, 27928 km 0,4-6-10-35-110 kV kuchlanishli elektr uzatish tarmoqlari va 9640 ta transformator punktlari orqali 670 mingdan ziyod iste'molchiga elektr energiyasi yetkazib beriladi.

Nihoyasiga yetayotgan 2020 yilda viloyatda elektr ta'minotini yaxshilash borasida “Qashqadaryo hududiy elektr tarmoqlari” AJ tomonidan inshoot, uskuna va tarmoqlarni yangilash borasida qator ishlar amalga oshirildi.

Sohadagi uzilishlarning oldini olishda mavjud tarmoq va inshootlarning soz holatda bo‘lishi muhim ahamiyatga ega. Aksariyat holatlarda uzilishlar tarmoqlarning eskirganiga borib taqaladi.

Shu sababdan,  yilning bugungi kuniga qadar viloyatning shahar va tumanlari hududlarida 1057,3 km uzunlikdagi elektr uzatish tarmoqlari va 286 dona transformator punktlari yangidan qurilib, rekonstruksiya ishlari amalga oshirildi. Ayni vaqtda ham qator tumanlarda xuddi shu boradagi ishlar davom etmoqda.

Iqtisodiyot tarmoqlari va ijtimoiy sohani 2020/2021 yillar kuz-qish davrida barqaror ishlashga kompleks tayyorlash yuzasidan 2 098,1 km uzunlikdagi 0,4-6-10-35-110 kV elektr uzatish tarmoqlari va 701 dona transformator punktlarida mukammal ta'mirlash ishlari bajarildi.

Yuzaga kelgan avariya holatlarini bartaraf etish va boshqa tegishli vazifalar uchun 22 ta maxsus brigada tashkil etildi, 48 ta maxsus avtotransport vositasi shay holatga keltirildi.

Elektr tarmoqlari korxonasi jamoasi bu boradagi ishlarni davom ettirib, kelgusi yilda yanada yuqoriroq marralarni zabt etishni maqsad qilmoqda.  

Yana bir jihat: Elektr energiyasini hisoblashning avtomatlashtirilgan tizimi — ASKUE iste'molchilarni elektr energiyasi bilan uzluksiz ta'minlashda muhim omillardan biri hisoblanadi. Shu sababdan viloyatda mazkur tizimni to‘liq joriy etish maqsadida amaliy ishlar olib borilmoqda.

O‘zbekiston Respublikasi Prezidentining 2018 yil 23 oktyabrdagi “Elektr energetikasi tarmog‘ini jadal rivojlantirish va moliyaviy barqarorligini ta'minlash chora-tadbirlari to‘g‘risida” qaroriga asosan bugungi kungacha Qashqadaryo viloyatidagi iste'molchilarga 368 144 dona EEHO va NQAT ga mos (ASKUE talabiga javob beradigan) elektr hisoblagichlari o‘rnatilgan.

Bu ishlar “Hududiy elektr tarmoqlari”AJ “Qashqadaryo HET”AJning o‘z mablag‘lari hisobidan amalga oshirilgan. Ya'ni, yangi tizimga ulanish va bu turdagi hisoblagichlar o‘rnatish uchun iste'molchidan mablag‘ talab etilmaydi.

Albatta, amalga oshirilayotgan ishlarga qaramasdan hali hamon joylarda elektr ta'minotida uzilishlar bo‘lmoqda. Mazkur uzilishlarni keltirib chiqargan omillar o‘rganilib, muammoni bartaraf etish bo‘yicha sa'y-harakatlar davom ettirilmoqda. Bu bo‘yicha amalga oshirilayotgan ishlarimiz o‘z natijasini berishiga ishonamiz.

Elektr tarmoqlari korxonasi jamoasi bu boradagi ishlarni davom ettirib, kelgusi yilda iste'molchilarni sifatli va uzluksiz elektr energiyasi bilan ta'minlashni o‘z oldiga vazifa qilib olgan.

“Qashqadaryo hududiy elektr tarmoqlari” AJ axborot xizmati